हिमाल खरेल, मेचीनगर

अबयोमी फकुन्ले नायक बन्दा सहिद स्मारक ए डिभिजन लिग विजेता चर्च ब्वाइज युनाइटेड ३–० को पछि परेको खेल उल्टाउँदै मेचीनगर गोल्डकपको फाइनल प्रवेश गरेको छ ।

लिग उपविजेता मछिन्द्र विरुद्ध आज ४-३ को रोमाञ्चक जित निकाल्दै चर्च ब्वाइजले फाइनलको यात्रा तय गरेको हो ।

चर्च ब्वाइजले शनिबार फाइनलमा आयोजक काँकरभिट्टा फुटबल ट्रेनिङ सेन्टरसँग प्रतिस्पर्धा गर्नेछ ।

खेलको ३० औं मिनेटमा मछिन्द्रले अग्रता लिएको थियो । पेनाल्टी एरियामा क्लियर हुन नसकेको बललाई विदेशी खेलाडी युसुफ मलिकले गोल गरे ।

४३ औं मिनेटमा मछिन्द्रले अग्रता दोब्बर बनायो । आदित्य शाक्यको क्रसमा एन्द्रेस नियाले गोल गरे । त्यसको १ मिनेट बित्न नपाउँदै युसुफ मलिकले मछिन्द्रका लागि अर्काे गोल थपे ।

मैदानको मध्य भागबाट अगाडि बढाएको बललाई उनले सुन्दर गोल गरे पनि मछिन्द्रको जितका लागि यो स्कोर पर्याप्त बन्न सकेन ।

खेलको पहिलो हाफसम्म ३-० ले पछाडि परेको चर्च ब्वाइजका लागि खेलको ६१ औं मिनेट विदेशी खेलाडी अबयोमीले पहिलो गोल फर्काए । मछिन्द्रका डिफेन्डरले क्लियर गर्न नसकेको बललाई उनले एकल प्रयासमा गोल गरे ।

खेलको ६९ औँ मिनेटमा अबयोमीले व्यक्तिगत दोस्रो गोल गरे । मछिन्द्रका डिफेन्डरको तालमेल नमिल्दा दोस्रो बार च्यापेर उनले गरेको सटिक प्रहार गोलमा परिणत भयो ।

खेलको ७८ औँ मिनेटमा रिचार्ड विल्सनले गोल गर्दै स्कोर ३–३ को बराबरीमा ल्याए । अबयोमी क्रसमा मछिन्द्रका दुईजना डिफेन्डरलाई बिट गर्दै गोल गरेका हुन् ।

खेलको ८७ औँ मिनेटमा अबयोमीले ह्याट्रिक पूरा गरे । मछिन्द्रका डिफेन्डर अघि बढेको मौकाको फाइदा लिँदै उनले प्रतियोगिताकै पहिलो ह्याट्रिक पूरा गरे । त्यहि गोल खेलको निर्णायक बन्यो।

खेलको १५ औँ मिनेटमा चर्च ब्वाइजका जय गुरुङको क्रसमा रिचार्डको हेडर मछिन्द्रका गोलकिपर विशाल श्रेष्ठले पञ्च गरे । ५२ औँ मिनेटमा समिर तामाङको प्रहारलाई गोलकिपरले बचाए ।

नवौँँ मिनेटमा मच्छिन्द्रका युसुफ मलिकले फर्स्टबारमा प्रहार गरेको बल गोलकिपरले बचाउँदै कर्नर बनाए । २० औँ मिनेटमा १८ यार्डबाट पाएको फ्रिकिकमा मोहित गुरुङको प्रहारले जाली चुम्न सकेन ।

७२ औँ मिनेटमा विदेशी खेलाडी एन्द्रेस नियाको प्रहार गोलकिपर टिकेन्द्र थापाले उत्कृष्ट बचाउ गरे ।

दोस्रो हाफमा ह्याट्रिक गरेका अबयोमी प्लेयर अफ दि म्याच घोषित भए। उनले ११ हजार रुपैयाँ र ट्रफी ।

खेलपछि चर्च ब्वाइजका प्रशिक्षक सुमन श्रेष्ठले आफ्नो फुटबलको २५ वर्षको करियरमा यस्तो किसिमको पहिलो कमब्याक खेल भएको बताए । उनले आफ्ना खेलाडी निरन्तरको खेलले थकित भएको र दोस्रो हाफपछि रणनीति परिवर्तन गरेकाले छिट्टै कमब्याक भएर जित निकाल्न सकिएको बताए ।

मछिन्द्रका प्रशिक्षक सन्जिव न्यौपानेले पहिलो हाफ राम्रो भएको तर दोस्रो हाफमा आफू सम्हालिन नसक्दा हार बेहोर्नु परेका बताए । उनले खेलाडी थाकेकाले पनि दोस्रो हाफमा भनेजस्तो खेल्न नसकेको बताए ।

चैत २ गते फाइनल हुने प्रतियोगिताको विजेताले १० र दोस्रो हुनेले टोलीले ५ लाख रुपैयाँ प्राप्त गर्नेछ।