काठमाडौं (हाम्रो खेलकुद)- अखिल नेपाल फुटबल संघ (एन्फा) ले उर्जन श्रेष्ठलाई नेपाली यु १९ पुरुष टोलीको मुख्य प्रशिक्षक नियुक्त गरेको छ।

अर्को महिना भारतमा आयोजना हुने साफ यु-१९ च्याम्पियनसिपका लागि एन्फाले श्रेष्ठलाई युवा टोलीको जिम्मेवारी दिएको हो‌।

एन्फा महासचिव किरण राईले प्रशिक्षक श्रेष्ठलाई आज नियुक्त पत्र प्रदान गरे। यसअघि पनि उनले नेपालमा भएको साफ यु-२० च्याम्पियन्सिपमा युवा टोली सम्हालेका थिए। नेपाल त्यसको फाइनलमा बंगलादेशसँग ४-१ ले पराजित भएको थियो । यो पटक प्रतियोगिता यु-१९ फरम्याटमा‌ हुँदैछ।

यसपटक च्याम्पियनसिप २०८२ को वैशाख २६ देखि जेठ ४ सम्म भारतको अरुणाचल प्रदेशमा हुनेछ।च्याम्पियनसिपको खेल तालिका पनि सार्वजनिक भैसकेको छ। सबै खेल गोल्डेन जुब्ली स्टेडियम युपियामा हुनेछ।

च्याम्पियनसिपमा कुल ९ खेल हुनेछन्। जहाँ समुह चरणमा ६ तथा २ सेमिफाइनल र फाइनल हुनेछ।नेपालले वैशाख २८ श्रीलंकासँग खेल्दै च्याम्पियनसिपको सुरुवात गर्नेछ । नेपालले दोस्रो खेल चिरप्रतिद्वन्द्वी भारतसँग वैशाख ३० गते खेल्नेछ ।

नेपाल समूह ‘बी’ मा भारत र श्रीलङ्कासँग रहेको छ। समूह ‘ए’ मा बङ्गलादेश, माल्दिभ्स, र भुटान छन्। दुवै समूहका शीर्ष दुई टोली सेमिफाइनलमा पुग्नेछन्।

नेपाल यो च्याम्पियनसिपको दुई पटकको विजेता हो । नेपालले सन् २०१५ मा स्वदेशमा भएको पहिलो संस्करणको र २०१७ मा उपाधि जितेको थियो।