सुशील पन्त क्षेत्री,चितवन

त्रिभुवन आर्मी फुटबल क्लब चितवनमा जारी राष्ट्रिय महिला फुटबल प्रतियोगिताको सेमिफाइनलमा पुगेको छ ।

आज भएको पहिलो चरणको अन्तिम खेलमा आर्मीले संकटा एफसी काठमाडौंलाई २-० ले हराउँदै अन्तिम चारको यात्रा तय गर्यो।

आर्मीको जितमा हिमा चौधरी र चन्द्रा भण्डारीले गोल गरे । पहिलो हाफमा आर्मीलाई रोकेको संकटा दोस्रो हाफमा गोलको‌ सामना गर्यो ।

५७ औं मिनेटमा हिमाले पेनाल्टी बक्स बाहिरबाट सन्दर गोल गर्दै आर्मीलाई अग्रता दिलाइन् ।

इन्ज्युरी समयको पहिलो मिनेटमा चन्द्राले आर्मीका लागि दोस्रो गोल गरिन् । विमला थापाको पासमा चन्द्राले गोल गरेपछि आर्मीको जित निश्चित भयो ।

आर्मीकी हिमा प्लेयर अद दि म्याच भइन् । योसँगै सेमिफाइनल समीकरण पूरा भएको छ ।

प्रतियोगिताको पहिलो सेमिफाइनलमा बुधवार भरतपुर २४ र एपिएफ एफसीबीच हुनेछ। खेल दिउँसो ४ बजे हुनेछ । दोस्रो सेमिफाइनलमा बिहीवार आर्मीले रौतहटको सामना गर्नेछ ।

चितवन जिल्ला फुटबल संघको आयोजना तथा भरतपुर महानगरपालिकाको प्रवर्द्धनमा जारी प्रतियोगिताको विजेताले ट्रफीसहित ३ लाख र दोस्रो हुने टोलीले १ लाख ५० हजार रुपैयाँ प्राप्त गर्नेछ ।

सर्वोत्कृष्ट खेलाडीले ४० र विधागत उत्कृष्टले २० हजार रुपैयाँ प्राप्त गर्नेछन् ।