काठमाडौं (हाम्रो खेलकुद) – शहिद स्मारक बी डिभिजन लिगमा बाँसबारी युथ क्लबले रानी पोखरी कर्नर टिम (आरसीटी) लाई रोमाञ्चक खेलमा ४-२ गोल अन्तरले हराएको छ ।

बाँसबारीको यो पहिलो जित हो भने आरसीटी लगातार दोस्रो हार बेहोर्न पुग्यो । एन्फा कम्प्लेक्समा आज भएको खेलमा बांशबारीले २५ मिनेट भित्र दुई गोल गर्यो । १६ औं मिनेटमा सरोज दर्लमीले करिब २० यार्ड टाढाबाट हानेको प्रहार उत्कृष्ट गोलमा परिणत भयो ।

यसपछि २५ औं मिनेटमा बाँसबारीले अग्रता दोब्बर गर्यो। कमजोर डिफेन्सको फाइदा उठाउँदै विकी राईले गोल किपर सोनाम वाइबासँगको वान भर्सेज वानमा गोल गरे । पहिलो हाफ २-० मा सकियो ।

दुई गालले पछि परेको आरसीटीले दोस्रो हाफ सुरू भएको सातौं मिनेटमा एक गोल फर्कायो । मन्जील खड्काको हेडर गोलमा आरसीटीले खेलमा फर्कने संकेत देखायो । ७४ औं मिनेटमा सुदीप लामाले गोल गर्दै खेललाई २-२ को रोमाञ्चक मोडमा पुर्याए ।

आरसीटीले खेललाई बराबरीमा पुर्याएको एक मिनेट पछि नै बाँसबारीले पेनाल्टीको अवसर प्राप्त गर्यो । सुशन लामाको ह्यान्ड भएपछि रेफ्री श्याम दनुवारले बाँसबारीलाई पेनाल्टी दिए । पेनाल्टीमा संगम खाँड ठकुरीले गोल गर्दा बाँसबारी अग्रतामा फर्कियो ।

यसपछि ८४ औं मिनेटमा काउन्टर अटयाकमा किपरसँगको वान भर्सेज वानमा विकी राईले गोल गरे । विकीको यो व्यक्तिगत दोस्रो गोल हो । योसँगै बाँसबारीले आरसीटीलाई ४-२ को रोमाञ्चक नतिजामा हराउँदै पहिलो जित दर्ता गर्यो।

दुई खेलबाट बाँसबारीले ३ अंक बनाएको छ । यसअघि बाँसबारी सरस्वती युथ क्लबसँग २-१ ले हारेको थियो ।

लगातार दोस्रो खेलमा पराजित आरसीटीले अंकको खाता खोल्न सकेन । आरसीटी पहिलो खेलमा श्री भगवती क्लबसँग ३-१ ले पराजित भएको थियो ।

लिग अन्तर्गत भोलि सरस्वती युथ क्लब र नयाँ बस्तीबीच खेल हुनेछ।