काठमाडौं (हाम्रो खेलकुद)- इंग्ल्याण्ड तथा म्यानचेष्टर युनाइटेडका पूर्व डिफेण्डर रियो फर्डिनान्डले हस्ताक्षर गरेको ललितपुर सिटीको जर्सी अक्सन गराइएको थियो ।

नेपाल सुपर लिग (एनएसएल) को तेस्रो संस्करणका लागि बिहीवार ललितपुर सिटी एफसीले जर्सी सार्वजनिक गर्ने कार्यक्रममा जर्सीको बेस प्राइज ५० हजार रुपैयाँ राखिएको थियो ।

हरेक बिडमा ५ हजार रुपैयाँ थपिँदै गएको थियो । धेरैले जर्सी लिन चाहेका थिए ।

अन्तिममा सरोज कार्की ले १ लाख १५ हजार रुपैयाँ बिड गर्दै जर्सी किने । कार्की आफू पहिला देखि युनाइटेड र रियो फर्डिनान्डको फ्यान भएको बताए ।

फर्डिनान्डले केही राम्रो गोल गरेर टोलीलाई जिताएको स्मरणमा जर्सीका लागि लाख रुपैयाँ भन्दा बढी खर्च तयार भएको कार्कीको भनाइ थियो ।

ललितपुरको जर्सी सार्वजनिक

एनएसएलको साविक विजेता ललितपुर सिटी एफसीले तेस्रो सिजनको लागि जर्सी सार्वजनिक गरेको छ ।

ललितपुर महानगरपालिकाका मेयर चिरिबाबु महर्जनले बिहीवार क्लबको आधिकारिक जर्सी सार्वजनिक गरेका हुन। ललितपुरले एनएसएलमा प्रयोग गर्ने दुवै खाले जर्सी सार्वजनिक गरेको हो । एउटा रातो/कालो छ भने अर्को सेतो/रातो छ । जर्सीमा नेवारी हाकुपटासीको रङ झल्किन्छ। 

मेयर महर्जनले दोस्रो संस्करणमा ललितपुरले उपाधि जितेर नेवारी भोज खुवाएर खुसीयाली मनाएको स्मरण गर्दै यस पटक विजेता बनेमा नगदबाटै पुरस्कृत गरिने बताए ।