एजेन्सी – डेनमार्कलाई क्वाटरफाइनलमा पराजित गर्दै पोर्चुगल युइएफए नेसन्स लिगको सेमिफाइनलमा प्रवेश गरेको छ ।

क्वाटरफाइनलको दोस्रो लेगमा आइतवार ५-२ को जित निकालेको पोर्चुगल समग्रमा ५-३ अग्रतासहित अघि बढ्यो । पहिलो लेगमा डेनमार्क १-० ले विजयी भएको थियो ।

पोर्चुगललाई घरेलु मैदानमा जित दिलाउन फ्रान्सिस्को ट्रिन्काओले २ , क्रिस्टियानो रोनाल्डो र गोन्सालो रामोसले समान १ गोल गरे ।

१ गोल डेनमार्कले पोर्चुगललाई उपहारस्वरुप दिएको थियो । डेनमार्कका लागि भने क्रिस्टियन इरिक्सन र रामसुस क्रिस्टेन्सेनले गोल गरे ।

३८औं मिनेटमा जोआकिम एन्डरसनको आत्मघाती गोलमा पोर्चुगलले अग्रता लियो । ५६औं मिनेटमा रामसुस क्रिस्टेन्सेनले गोल गर्दै डेनमार्कलाई बराबरीमा पुर्याए ।

रोनाल्डोले ७२औं मिनेटमा गोल गर्दै पोर्चुगललाई अग्रता दिलाए । त्यसको ४ मिनेटपछि इरिक्सनले गोल गर्दै घरेलु समर्थकलाई स्तब्ध बनाए । खेलको ८६औं मिनेटमा गोल गर्दै पोर्चुगलका फ्रान्सिस्कोले खेललाई ३-२ मा पुर्याए ।

समग्रमा ३-३ बराबरीपछि खेल अतिरिक्त समयमा पुग्यो । थप समयको सुरुवातमा फ्रान्सिस्कोले व्यक्तिगत दोस्रो गोल पूरा गरे । गोन्सालो रामोसले १ सय १५औं मिनेटमा गोल गर्दै पोर्चुगललाई सेमिफाइनलमा पुर्‍याए ।

सन् २०१९ मा नेसन्स लिगको पहिलो संस्करण जितेको पोर्चुगल सोही लय दोहोर्‍याउने लक्ष्यमा छ।

पोर्चुगलले अब जुन महिनामा आयोजना हुने अन्तिम ४ मा आयोजक जर्मनीसँग प्रतिस्पर्धा गर्नेछ ।