सुमन अधिकारी,बुटवल

युवराज खड्काको गोलमा एपिएफ एफसी रुपन्देही जारी २३ औं तिलोत्तमा गोल्ड कप फुटबल प्रतियोगिताको फाइनलमा प्रवेश गरेको छ ।

देविनगरस्थित एन्फा टेक्निकल खेलमैदानमा भएको पहिलो सेमिफाइनलमा बुधवार संकटा एफसीलाई १-० ले पराजित गर्दै १० खेलाडीमा सिमित एपिएफ उपाधि नजिक पुगेको हो।

गत महिना काठमाण्डौंमा भएको केपी ओली कपमा संकटाले एपिएफलाई हराएको थियो। संकटा केपी ओली कपको च्याम्पियन टोली हो।

५८ औं मिनेटमा एपिएफ १० खेलाडीमा सिमित भएको थियो । संकटाका सिर्जनराज गौतमलाई फाउल गरेपछि एपिएफका विपन श्रेष्ठले रातो कार्ड पाएका थिए ।

इन्ज्युरी समयमा युवराजले गोल गरेपछि एपिएफले अन्तिम दुईको यात्रा गरेको हो । युवराज प्लेयर अफ दी म्याच घोषित भए र उनले ११ हजार १ सय ११ रुपैयाँ प्राप्त गरे ।

प्रतियोगिताको दोस्रो सेमिफाइनलमा बिहीवार मच्छिन्द्र एफसी र चर्च ब्याइज युनाइटेडबीच प्रतिस्पर्धा हुनेछ।

रुपन्देही जिल्ला फुटबल संघको आयोजना र बुटवल उपमहानगरपालिकाको संरक्षक रहेको प्रतियोगितालाई यशोदा फुड्स प्रालि र त्रिमुर्ति ईण्डस्ट्रिज प्रालिको मुख्य प्रायोजन गरेको छ ।

प्रदेश खेलकुद परिषद लुम्बिनी मुख्य प्रतियोगिताको मुख्य सहयोगी रहेको छ। प्रतियोगिताको विजेता टोलीले ट्रफीसहित १२ लाख १२ हजार २ सय २२ रुपैयाँ र दोस्रो टोलीले ६ लाख ६६ हजार६ सय, ६६ रुपैंयाँ प्राप्त गर्नेछ।