सुमन अधिकारी, बुटवल

चर्च ब्याइज युनाइटेड रुपन्देहीमा जारी २३ औं तिलोत्तमा गोल्ड कप फुटबल प्रतियोगिताको फाइनलमा प्रवेश गरेको छ।

दोस्रो सेमिफाइनल बिहीवार १० खेलाडीमा सिमित मच्छिन्द्र एफसीलाई ४-१ ले पराजित गर्दै चर्च ब्वाइज उपाधि नजिक पुगेको हो।

देविनगरस्थित एन्फा टेक्निकल खेल मैदानमा भएको खेलको पाँचौं मिनेटमा मच्छिन्द्र १० खेलाडीमा सिमित भएको थियो ।

मच्छिन्द्रका रोशन दोङले चर्च ब्वाइजका अरमान बिउडोनलाई फाउल गरेपछि रेफ्रिले रातो कार्ड दिएका थिए । वन भर्सेज वनमा डिबक्स नजिक गोलका लागि अगाडी बढेका अरमानलाई रोशनले पछाडिबाट ट्याकल गरेर लडाएका हुन् ।

३६ औं मिनेटमा चर्च ब्वाइज लागि अरमानले गरे । अरमानले ४२ औ मिनेटमा पेनाल्टीमा गोल गर्दै अग्रता दोब्बर पारे। मछिन्द्रका कतान करिमा ओेमिलाजा नुरिनले आफूलाई फाउल हानेपछि पाएको पेनाल्टीमा अरमानले गोल गरेका हुन्।

४४ औं मिनेटमा अरमानले गोल गर्दै ह्याट्रिक पूरा गरे । कप्तान फकुने अबयोमीले ६५ औं मिनेटमा गोल गर्दै चर्च ब्याइजको अन्तरलाई ४-० बनाए ।

मच्छिन्द्रले दोस्रो हाफमा दुई मिनेटको फरकमा पाएको २ वटा पेनाल्टी सदुपयोग गर्न सकेन । फोडा फोफानालाई चर्च ब्वाइजका अजित चौधरीलाई डिबक्स भित्र लडाएपछि पाएको पेनाल्टी चर्चका गोलकिपर विवश चौधरीले रोके । लक्ष्मण रुचालले प्रहार गरेको दोस्रो पेनाल्टी प बारमा लागेर फर्कियो।

खेलको ८९ औं मिनेटमा वन भर्सेज वनमा मच्छिन्द्रका एलेक्स विलियमले गोल‌ गरे । चर्च ब्याइजका फकुने अबयोमी प्लेयर अफ दी म्याचबाट घोषित भए र उनले ११ हजार १ सय ११ रुपैयाँ प्राप्त गरे।

चर्च ब्वाइजले शनिवार एपिएफसँग फाइनल खेल्नेछ।
एपिएफले पहिलो सेमिफाइनलमा संकटा क्लबलाई १-० ले हराएको थियो।

रुपन्देही जिल्ला फुटबल संघको आयोजना र बुटवल उपमहानगरपालिकाको संरक्षक रहेको प्रतियोगितालाई यशोदा फुड्स प्रालि र त्रिमुर्ति ईण्डस्ट्रिज प्रालिको मुख्य प्रायोजन गरेको छ ।

प्रदेश खेलकुद परिषद लुम्बिनी मुख्य प्रतियोगिताको मुख्य सहयोगी रहेको छ। प्रतियोगिताको विजेता टोलीले ट्रफीसहित १२ लाख १२ हजार २ सय २२ रुपैयाँ र दोस्रो टोलीले ६ लाख ६६ हजार६ सय, ६६ रुपैंयाँ प्राप्त गर्नेछ।