सुमन अधिकारी, बुटवल

तिलोत्तमा गोल्डकप फुटबल प्रतियोगिताले शनिवार नयाँ च्याम्पियन पाउनेछ ।

रुपन्देही जारी तिलोत्तमाको २३ औं तिलोत्तमा दुवै टोली पहिलो पटक फाइनल पुगेका कारण नयाँ च्याम्पियन बन्ने निश्चित छ।

फाइनलमा चर्च ब्याइज युनाइटेड र एपीएफ क्लब भिड्दैछन् । बुटवलको देविनगरस्थित एन्फा एकेडेमीको मैदानमा फाइनल दिउँसो ३ बजे सुरु हुनेछ ।

शुक्रवार प्रि म्याच कन्फ्रेन्समा दुबै टिमका प्रशिक्षक तथा कप्तानले उपाधि जित्ने विश्वास व्यक्त गरे।

एपिएफका प्रशिक्षक टोप बहादुर बिष्टले फाइनलका लागि तयार रहेको र ट्रफी जितेर इतिहास रच्ने बताए । उनले भने, ‘हामी लयमा छौं । सेट टिम छ आत्मविश्वास भएकाले उपाधि जित्नेमा ढुक्क छौं ।’

एपिएफ कप्तान हरि कार्कीले लामो समयदेखि सँगै खेलेकोमा टोलीमा तालमेलमा सहजता हुने जनाउँदै उपाधि जित्नका लागि शारीरिक र मानसिक रूपमा तयार रहेको बताए ।

चर्च ब्वाइजका प्रशिक्षक आशिक थापामगरले पछिल्लो समय टोली बलियो रहेको आफ्नो साख जोगाउने लक्ष्य भएको बताए । उनले भने,’ फाइनल खेल हो । जित दुबै टिमको लक्ष्य हुन्छ । हामी जित्ने गरी नै खेल्छौं ।’

चर्च ब्याइजका कप्तान फाकुने एबायोमीले भने,’पक्कै पनि प्रतिद्वन्द्वी टोली सेट र बलियो छ । हामी पनि उपाधि जित्न चाहान्छौं । फाइनलमा च्यालेन्ज छ ।’

रुपन्देही ११ लाई पहिलो खेलमा र सेमिफाइनलमा संकटा क्लबलाई समान १-० हराउँदै फाइनलमा पुगेको थियो।

नेपाल पुलिस क्लबलाई पहिलो खेलमा टाइब्रेकरमा हराएको चर्च ब्वाइजले सेमिफाइनलमा मच्छिन्द्र एफसीलाई सहजै ४-१ ले हराएर उपाधि नजिक पुगेको थियो।

जारी सिजनमा चर्च ब्याइज र एपिएफको यो दोस्रो भेट हुनेछ। यसअघि सातौं बागमती गोल्डकप फुटबलको सेमिफाइनलमा चर्च ब्याइजले एपिएफलाई पराजित गरेको थियो ।