भिल्लारियल (एजेन्सी)– भिल्लारियलसँग २–० को पछि रहेको अवस्था उल्टाउँदै गए राती ३–२ को जित हासिल गरेपछि रियल मड्रिड पुनः ला लिगा अंक तालिकाको शीर्षस्थानमा उक्लेको छ । त्यसअघि लियोन मेस्सीको निर्णायक गोलमा एट्लेटिको मड्रिडलाई २–१ ले हराएपछि रियललाई पछि पारेको बार्सिलोना पछिल्लो नतिजा पछि फेरी १ अंकले पछि परेको छ ।
दोस्रो हाफमा ट्रिगुइरोज मुनोज र बाकाम्बुको गोलमा घरेलु टोली भ्यालेन्सियाले २ गोलको अग्रता लिएको थियो । खेलको ५० औँ मिनेटमा मुनोजको गोलमा अग्रता लिएको भिल्लारियलका लागि ६ मिनेट पछि बाकाम्बुले गोल गरेका थिए ।
निकै नै रोमाञ्चक दोस्रो हाफमा ग्यारेथ बेलले हेड मार्फत गोल गर्दै रियललाई खेलमा फर्काएका ६४ औं मिनेटमा रियल २–१ ले पछाडि थियो । बेलले गोल गरेको १० मिनेट पछि भिल्लारियलका ब्रुनोले पेनाल्टी बक्समा बल ह्यान्ड गरे ।
त्यसमा प्राप्त पेनाल्टीलाई क्रिस्टियानो रोनाल्डोले गोलमा परिणत गर्दा खेलमा २–२ को बराबरी भएको थियो । खेल सकिन ७ मिनेट बाँकी रहादा अल्भारो मोराटाले गरेको गोल खेलको निर्णायक बन्यो र रियल विजयी बन्यो । रियल ५५ अंक सहित शीर्षस्थानमा रहेको छ भने १ खेल बढी खेलेको बार्सिलोनाको रियलको भन्दा १ अंक कम छ ।
