काठमाडौं (हाम्रो खेलकुद)- एनसेल नेपाल सुपर लिग (एनएसएल) मा एफसी चितवन र पोखरा थन्डर्सबीचको खेल जारी छ। पहिलो हाफको समाप्तिमा चितवनले १-० को अग्रता बनाएको छ।

दशरथ रंगशालामा जारी खेलमा आज दुवै टिमले प्लेइङ‌इ इलेभेनमा समान ५ विदेशी खेलाडीलाई खेलायो। जहाँ खेलको १४ औं मिनेटमा नै चितवनले अग्रता बनायो।

भिक्टर मानसारेले कट ब्याक गर्दै दिएको पासमा शिशिर लेखीले छोडिदिएको बलमा नोडिर माभलोनोभको राइट फुटेट सट उत्कृष्ट गोलमा परिणत भयो। चितवनले १-० को अग्रता बनायो।

३१ औं मिनेटमा चितवनका शिशिरको पावरफुल सटलाई पोखराका गिल्याम प्रिसोले पञ्च गर्दै बचाए। चितवनले अग्रता दिगुना गर्ने मौका गुमायो। यता पोखराले पहिलो हाफमा पोष्ट चार्ज समेत गर्न सकेन।

खेल १८ मिनेट ढिलो सुरु भएको थियो। खेल सुरु हुन अगाडि नै पोखराले चितवनका विदेशी खेलाडीको श्रम स्वीकृतिको कागजात माग गरेको थियो।

आज सार्वजनिक विदा भएको कारण सम्पूर्ण प्रक्रिया पुरा गरे पनि कागजात नआएको तर युवा तथा खेलकुद मन्त्रालय र राष्ट्रिय खेलकुद परिषदको पत्र पनि आयोजकलाई बुझाएको भनाई चितवनको छ। तर पोखराले सक्कल कागजात खोज्दा विवाद भएको हो।

चितवन एनएसएलमा नै तेस्रो जितको खोजीमा छ। चितवनले पहिलो सिजनमा एउटा खेल पनि जितेन। दोस्रो सिजनमा भने दुई खेल जितेको थियो।

पोखरा र चितवनबीच यो तेस्रो पटक प्रतिस्पर्धा भएको हो। यसअघि दुवै खेल पोखराले जितेको थियो।