काठमाडौं (हाम्रो खेलकुद) – शहिद स्मारक बि डिभिजन लिग अन्तर्गत बुधबार प्लानिङ ब्वाइज युनाइटेड र वीरगन्ज युनाइटेडले जित दर्ता गरेका छन् ।

प्लानिङ ब्वाइजले लिगमा लगातार चौथो जित निकाल्ने क्रममा ब्वाइज युनियन क्लबलाई २-१ ले हराएको हो । खेलको १२ औं मिनेटमा प्लानिङ ब्वाइजले पहिले अग्रता बनायो । पुजन थापाको पासमा प्रताप सिंहले बक्स बाहिरबाट हानेको प्रहार गोलमा परिणत भयो ।

दोस्रो हाफ सुरू भएको दोस्रो मिनेटमा ब्वाइज युनियनले बराबरी गोल फर्काउँदा खेल रोमाञ्चक मोडमा पुग्यो । सञ्जीव लामाले गोल गरे । तर यसको ६ मिनेटपछि नै प्लानिङ ब्वाइजले फेरि अग्रता बनायो । रूजन न्यौपानेको गोलमा प्लानिङ ब्वाइजले २-१ को अग्रता लियो ।

त्यसअघि दिनको पहिलो खेलमा वीरगन्ज युनाइटेडले बाँसबारीलाई २-१ ले नै हरायो । पहिलो हाफ गोलरहित रहेको खेलको दोस्रो हाफ रोमाञ्चक बन्यो । ६६ औं मिनेटमा विवेक चौधरीले गोल गर्दै वीरगन्जलाई अग्रता दिलाए । ८५ औं मिनेटमा अमर डंगोलले अग्रता दोब्बर पारे ।

यसपछि खेलको अन्तिम मिनेटमा बाँसबारीका सन्दीप लिम्बुले एक गोल फर्काए । यो गोल सान्त्वना गोलमा सिमित हुन पुग्यो ।

यस नतिजासँगै प्लानिङ ब्वाइजले ४ खेलमा १२ अंकका साथ श्री भगवतीसँग २ अंकको अग्रता बनाएको छ । अपराजित वीरगन्ज ४ खेलमा ८ अंकका साथ तेस्रो स्थानमा छ । बाँसबारीको ४ खेलमा ६ अंक तथा ब्वाइज युनियनको ४ खेलमा ३ बराबरीसहित ३ अंक छ ।