काठमाडौं (हाम्रो खेलकुद)- तेस्रो एनसेल नेपाल सुपर लिग (एनएसएल) मा आज ललितपुर सिटी एफसी र पोखरा थन्डर्स एफसीबीचको खेल जारी छ।

पहिलो हाफको समाप्तीमा ललितपुरले २-१ को अग्रता बनाएको छ। दशरथ रंगशालामा भएको खेलमा साविक विजेता ललितपरले ११औं मिनेटमा अग्रता बनायो।

विदेशी खेलाडी जोनाथन इडवार्डोको कर्लिङ कर्नर प्रहार पोखराका गोल किपर गिलामो प्रिसोलाई डिफलेक्ट हुँदै गोल भयो।

खेलमा गोल गर्ने अवसर सिर्जना गर्न नसकेको पोखराले खेलको ४२ औं मिनेटमा बनाएको पहिलो मुभमा नै गोल गर्यो।

आयुष घलानको क्रसमा सबस्टिच्युट नवयुग श्रेष्ठको प्रहारलाई ललितपुरका गोल रक्षक जेफ्री बाल्टसले बल्क गरे। रिबाउन्डमा मार्की खेलाडी समिर तामाङले गोल गर्न सफल भए र खेल १-१ को बराबरीमा पुग्यो।

तर पोखराको यो खुसी धेरै बेर टिकेन। इन्ज्युरी समयको दोस्रो मिनेटमा ललितपुरले फेरि अग्रता बनायो। मणि लामाको सहयोगमा पोखराका गोल रक्षक प्रिसोसँगको वान भर्सेज वानमा जो आइडोले गोल गरे। यो सँगै पहिलो हाफमा ललितपुरले २-१ को अग्रता बनाएको छ।

ललितपुरले पहिलो खेल काठमाडौंसँग २-२ गोलको बराबरी खेलेको थियो। पोखरा भने चितवनसँग २-० ले हारेको थियो। दुवै टोली पहिलो जितको खोजीमा छन्।

पोखरा र ललितपुर एनएसएलमा यसअघि ३ पटक भिडेका छन्। ललितपुरले १ खेल जित्दा २ खेल बराबरीमा सकिएको थियो।