माउरिन्होले फर्गुसनको कीर्तिमानसँग बराबरी गरे

लन्डन (एजेन्सी)– म्यानचेस्टर युनाइटेडका प्रशिक्षक जाजे माउरिन्होले चार पटक लिग कप उपाधि जित्ने दुई प्रशिक्षकको कीर्तिमानसँग बराबरी गरेका छन् । युनाइटेडका पूर्व प्रशिक्षक सर एलेक्स फर्गुसन र ब्रायन क्लफले चार पटक लिग कप जितेका थिए ।

आइतबार वेम्ब्लीमा ज्लाटान इब्राहिमोभिचको निर्णायकसहित २ गोलमा साउथह्याम्प्टनलाई ३–२ ले हराउँदै युनाइटेड लिग कप जितेको थियो । सुरुवातमा मानोलो गाबियाडिनीको गोललाई अफसाइट लिएपनि पछि उनकै दुई गोलमा साउथह्याम्पटनले खेललाई बराबरी गरेको थियो ।

तर, खेल सकिन तीन मिनेट बाँकी रहँदा इब्राहिमोभिचले हेड गोल गर्दै युनाइटेडलाई पाँचौं लिग कप दिलाएका थिए ।माउरिन्होका लागि भने त्यो चौथो थियो । चेल्सीले पोर्चुगिज माउरिन्होको प्रशिक्षणमा सन् २००५,२००७ र २०१५ मा लिग कप जितेको थियो ।

युनाइटेडको प्रशिक्षकका रुपमा माउरिन्होको लिग कप पहिलो उपाधि हो । पहिलो सिजनमै महत्वपूर्ण उपाधि दिलाउने माउरिन्हो युनाइटेडको पहिलो प्रशिक्षक पनि बनेका छन् ।