सुनिल गाउँले,सिमरा

हनामी बिएफसी भरतपुरले जीतपुरसिमरा गोल्डकप फुटबल प्रतियोगितामा विजयी सुरुवात गरेको छ ।

बाराको सिमरा रंगशालामा शुक्रवार राति फ्लडलाईटमा भएको १५ औं सिमरा गोल्डकपको उद्घाटन खेलमा भरतपुरले सिरहाको सलहेश युवा क्लबलाई २–१ ले पराजित गर्दै सेमिफाइनल यात्रा तय गरेको छ ।

भरतपुरको जितमा विशाल योञ्जन र राज भुषालले गोल गरे । सिरहाका लागि सुशील राईले गोल गरे ।
पहिलो हाफ गोल रहित बनेको प्रतिष्पर्धात्मक खेलको ६० औं मिनटमा भरतपुरले अग्रता लिएको थियो ।

आकाश थापा मगरको कर्नरमा पेनाल्टी बक्स भित्रबाट विशालले गोलमा परिणत गरे । सिरहाका गोलरक्षक सागर सुस्लिङले विशालको आकर्षक प्रहारलाई रोक्ने कुनै प्रयास गर्ने मौका नै पाएनन् ।

खेलको ७९ औं मिनटमा सुशीलले गोल गर्दै सिरहालाई खेलमा फर्काएका थिए । अमन लामाको क्रसपासलाई सदुपयोग गर्दै सुशीलले पेनाल्टी बक्स बाहिरबाट आकर्षक गोल गरे ।

अन्तिम समयमा सम्हालिन नसकेको सिरहाविरुद्ध निर्णायक गोल गर्दै भरतपुरले अन्तिम चारको यात्रा तय ग¥यो । खेलको ८५ औं मिनटमा राजले निर्णायक गोल गरे ।

भरतपुरका सुदिप मगरले प्रहार गरेको फ्रिकिक सिराहाका डिफेण्डरले हेडिङ मार्फत क्लिएर गर्ने क्रममा रिवाउण्ड बललाई करिब ३० यार्ड परबाट राजले गोल गरे ।

निर्णायक गोल गरेका राज ग्रीन इनर्जी प्लेयर अफ दि म्याच घोषित भए । उनले १० हजार रुपैयाँ र ट्रफी प्राप्त गरे । उनलाई जीतपुरसिमरा उपमहानगरपालिकाका नगर प्रमुख राजन पौडेलले ट्रफि हस्तान्तरण गरे ।

शनिवार आयोजक नवजनजागृति युवा क्लब सिमरा र हेटौंडाको एन्फा मकवानपुरका बीच खेल हुनेछ । जीतपुरसिमरा उपमहानगरपालिकाको मुख्य सहयोग रहेको प्रतियोगितामा ८ टोली सहभागी छन् ।