काठमाडौं (हाम्रो खेलकुद) – तेस्रो संस्करणको एनसेल एनएसएलमा ललितपुर सिटी एफसी र धनगढी एफसीबीच खेल जारी छ। पहिलो हाफ गोल रहित बराबरीमा सकिएको छ ।

दशरथ रङ्गशालामा जारी खेलको नवौं मिनेटमा साबिक विजेता ललितपुरले सुरूवाती अग्रता बनाउने मौका गुमायो‌ । मणि कुमार लामाको फ्री किकमा इमोह इजेकिएलको हेडरलाई धनगढीका डिफेन्डर काइसेडोले गोल लाइनबाट बचाए ।

१६ औं मिनेटमा धनगढीले पनि मौका गुमायो । धनगढीकै गोल रक्षक वालिद बिरोको लामो पासमा अहमद हिजाजीले हानेको प्रहार पोल नजिकैबाट बाहिरियो ।

यसपछि २१ औं मिनेटमा ललितपुरका केरभिन्स बेलफोर्टको हेडर पासमा इमोह इजेकिएलले गोल गर। तर एसिसटेन्ट रेफ्रीले अफ साइडको झन्डा उठाइदिए ।

३६ औं मिनेटमा धनगढीका जर्ज प्रिन्स कार्कीको फ्रि किकमा अहमद हिजाजीको ब्याक हेडरमा काइसेडो क्लोज रेन्जबाट चुके ।

खेलको ३९ औं मिनेटमा दुवै टिमका खेलाडीबीच विवाद हुँदा रेफ्री प्रज्वल क्षेत्रीले तीन खेलाडी र प्रशिक्षकलाई पहेंलो कार्ड दिए। ललितपुरका सनिष श्रेष्ठ र पापा केबे तथा धनगढीका मोहम्मद एल जे र प्रशिक्षक जुवान मार्टिनेजले पहेंलो कार्ड पाए । पहिलो हाफ गोल रहित बराबरीमा सकियो । पहिलो हाफमै रेफ्री प्रज्वल क्षेत्रीले ८ पहेंलो कार्ड देखाएका छन् ।

गत संस्करणको विजेता ललितपुरले पहिलो खेलमा काठमाडौंसँग २-२ गोलको बराबरीमा रोकिएको थियो । दोस्रो खेलमा पोखरा थन्डर्सलाई ३-२ ले हराएको थियो ।

दुई पटकको फाइनलिष्ट धनगढीले पहिलो खेलमा बुटवल लुम्बिनीलाई ४-१ ले हराएको थियो । आज भएको पहिलो खेलमा पोखरा थन्डर्सले काठमाडौं रेजर्सलाई २-० ले हराउँदै पहिलो जित निकालेको थियो ।