काठमाडौं (हाम्रो खेलकुद)- एनसेल नेपाल सुपर लिग (एनएसएल) मा ललितपुर सिटी एफसी र धनगढी एफसीबीचको खेल गोल रहित बराबरीमा सकिएको छ।

दशरथ रंगशालामा शनिवार दोस्रो खेलमा ललितपुरले दबाब बनाउँदै गोल गर्ने मौका सिर्जना गरपनि गोल गर्न सकेन। पहिलो खेलमा ४ गोल गरेको धनगढीले आज संघर्ष गर्यो।

खेलको नवौं मिनेटमा साविक विजेता ललितपुरले अग्रता बनाउने मौका गुमायो‌। मणि कुमार लामाको फ्रि किकमा इमोह इजेकिएलको हेडरलाई धनगढीका डिफेन्डर काइसेडोले गोल लाइनबाट बचाए।

१६ औं मिनेटमा धनगढीले पनि मौका गुमायो। धनगढीकै गोलरक्षक वालिद बिरोको लामो पासमा अहमद हिजाजीले हानेको प्रहार पोल नजिकैबाट बाहिरियो।

त्यसपछि २१ औं मिनेटमा ललितपुरका केरभिन्स बेलफोर्टको हेडर पासमा इमोह इजेकिएलले गोल गरे। तर एसिसटेन्ट रेफ्रीले अफ साइडको झन्डा उठाइदिए।

३६ औं मिनेटमा धनगढीका जर्ज प्रिन्स कार्कीको फ्रि किकमा अहमद हिजाजीको ब्याक हेडरमा काइसेडो क्लोज रेन्जबाट चुके।

खेलको ३९ औं मिनेटमा दुवै टोलीका खेलाडीबीच विवाद हुँदा रेफ्री प्रज्वल क्षेत्रीले ललितपुरका २, धनगढीका १ खेलाडी र प्रशिक्षकलाई पहेँलो कार्ड दिए।

ललितपुरका सनिश श्रेष्ठ र पापा केबे तथा धनगढीका मोहम्मद एल जे र प्रशिक्षक जुवान मार्टिनेजले पहेंलो कार्ड पाए।

खेलको ५० औं मिनेटमा ललितपुरका सनिशले धनगढीका डिफेन्डर मोहम्मत अल जेसँग बल खोसेर दिएको पासमा धनगढीका डिफेन्डरलाई लाग्दै फर्किएको बलमा मणिको प्रहारले सही दिशा लिन सकेन।

७१ औं मिनेटमा ललितपुरको अर्को मौकामा धनगढीका गोलरक्षक वालिद बाधक बने। पापा केबेको उत्कृष्ट क्रसमा केरभेन्स बरलफोर्टको डाइभिङ हेडरलाई वालिदले बचाए।

८४ औं मिनेटमा धनगढीका हिजाजीको प्रहारलाई ललितपुरका गोलरक्षक जेफ्री बाल्टसले उत्कृष्ट बचावट गरे।

इन्ज्युरी समयको छैटौं मिनेटमा मणिले करिब ३० यार्ड टाढाबाट हानके फ्री किक प्रहारलाई गोल रक्षक वालिदले पन्च गर्दै मुश्किलले बचाए। खेल गोल रहित बराबरीमा सकियो। दुवैले १/१ अंक बाँडे।

३ खेलबाट ललितपुरले ५ अंक बनाएको छ। ललितपुरले पहिलो खेलमा काठमाडौंसँग २-२ गोलको बराबरीमा खेलेको थियो। दोस्रो खेलमा पोखरा थन्डर्सलाई ३-२ ले हराएको थियो।

धनगढीले दुई खेलबाट ४ अंक जोड्यो। दुई पटकको फाइनलिष्ट धनगढीले पहिलो खेलमा बुटवल लुम्बिनीलाई ४-१ ले हराएको थियो।

आज भएको पहिलो खेलमा पोखरा थन्डर्सले काठमाडौं रेजर्सलाई २-० ले हराउँदै पहिलो जित निकालेको थियो।भोलि झापा एफसी र एफसी चितवनबीच खेल हुनेछ।