एजेन्सी – रियल म्याड्रिडको स्पेनिस ला लिगा उपाधि दौडमा धक्का लागेको छ।

ह्युगो डुरोले इन्ज्युरी समयमा गरेको निर्णायक गोलमा रियल शनिवार भ्यालेन्सियासँग २-१ ले स्तब्ध भएको छ।
शीर्ष स्थानको बार्सिलोनासँग टक्कर गरिरहेको रियललाई यो हार महंगो पर्न सक्छ‌।

इन्ज्युरी समयको पाँचौं मिनेटमा राफा मिरले दिएको उत्कृष्ट क्रसमा डुरोले नजिकैबाट हेड गर्दै गोल गरे।

त्यसअघि भ्यालेन्सियाका लागि माउक्तार डियाखाबीले १५ औं मिनेटमा हेड गोल गरेका थिए। आन्द्रे आल्मेडाको क्रसमा उनले गोल गरेका हुन्।

त्यसको केहि मिनेट पहिला रियलले गोल गर्ने अवसर चुकाएको थियो। भिनिसियस जुनियरको पेनाल्टी गोलकिपर जियोर्गी ममार्दाश्विलीले सजिलै जोगाएका थिए । त्यो पेनाल्टी सेजर टारेगाले रियलका किलियन एम्बापेलाई डिबक्समा लडाएपछि दिइएको थियो।

दोस्रो हाफको पाँचौं मिनेटमा भिनिसियसले बराबरी गोल गरेका थिए । एम्बापेले पनि एउटा प्रयासलाई पोस्टको नजिकबाट बाहिरिएको थियो।

६६ अंकसहित शीर्ष स्थानको बार्सिलोनाको भन्दा रियलको ३ अंक कम छ । रियलले एक खेल बढी खेलेको छ।

भ्यालेन्सियाका लागि यो एक ऐतिहासिक जित हो । सन् २००८ पछि पहिलो पटक टोलीले सान्टियागो बर्नाबेउ रंगशालामा जित निकालेको हो । भ्यालेन्सिया ३४ अंकका साथ १५ औं स्थानमा छ।

कार्लो एन्चेलोटीको टोली मंगलवार आर्सनलसँग च्याम्पियन्स लिगको क्वार्टर-फाइनल पहिलो लेग खेल्न एमिरेट्स स्टेडियम जानेछ।