एजेन्सी – बार्सिलोना घरेलु मैदानमा शनिवार रियल बेटिससँग १-१ को बराबरीमा रोकिएको छ।

त्यसका बाबजुद ला लिगाको शीर्ष स्थानको बार्सिलोनाले प्रतिद्वन्द्वी रियल म्याड्रिडलाई ४ अंकले पछि पारेको छ।

ह्यान्सी फ्लिकको टोलीले एकतर्फी प्रदर्शन गरेपनि बराबरीमा‌ चित्त बुझाउनु पर्यो। सबै प्रतियोगितामा लगातार ७ खेल जितेको यात्रा पनि बेटिसले तोडिदियो।

सातौं मिनेटमा मिडफिल्डर गाभीको गोलमा बार्सिलोनाले अग्रता बनाएको थियो। तर १० मिनेटपछि नै बेटिसले बराबरी गर्यो । डिफेन्डर नातानले जियोभानी लो सेल्पोको कर्नरमा हेड गर्दै गोल गरे।

दोस्रो हाफमा जुल्स कुण्डेले बार्सिलोनालाई पुनः अग्रता दिने मौका पाएका थिए। तर उनको प्रहार बेटिसका गोलकिपर एड्रियनले जोगाए।

बराबरीको नतिजाले बेटिसको पनि लगातार ४ खेलको जितको यात्रा अन्त्य भएको थियो ।

यसअघि शनिवार नै, भ्यालेन्सियाले ९५ औं मिनेटमा निर्णायक गोल गर्दै रियलाई २-१ ले हराएको थियो।
३० खेलपछि बार्सिलोनाको ६७ अंक छ। पाँचौं स्थानको बेटिसको ४८ अंक छ।

अन्य खेलमा इस्पानियोलले राय भालेसानोलाई ४-० ले, अल्भेसले जिरानोलाई‌ १-० ले सेल्टा भिगोले मालोर्कालाई २-१ ले हराएको थियो।

बार्सिलोना बुधवार घरेलु मैदानमा च्याम्पियन्स लिगको क्वार्टरफाइनल पहिलो लेगमा बोरुसिया डर्टमुण्डको सामना गर्नेछ ।