काठमाडौं (हाम्रो खेलकुद)– एनसेल नेपाल सुपर लिग (एनएसएल) मा एफसी चितवन र झापा फुटबल एफसीबीचको खेल जारी छ।

पहिलो हाफको समाप्तिमा चितवनले १-० को अग्रता बनाएको छ। टोरिक जेब्रिनले गोल गरे। लगातार दुई खेल जितेको चितवन तेस्रो जित निकाल्ने दाउमा छ। यता झापा भने पहिलो जितको मात्र होइन गोलको खाता खोल्न आतुर छ।

दशरथ रङ्गशालामा जारी खेलको पाँचौं मिनेटमा चितवनका भिक्टर मानसारेले बक्सको एजबाट हानेको प्रहार झापाका गोल किपर अन्जल श्रेष्ठले बचाए। लगत्तै आठौं मिनेटमा शिशिर लेखीको प्रहार पोलमा लाग्दा अर्को मौका चितवनले खेर फाले।

दशौं मिनेटमा झापाका अल्हाजी गेरोले बक्सभित्रबाट हानेको पावरफुल सटलाई गोलरक्षक अमाइ नाइटले उत्कृष्ट बचावट गरे।

२८ औं मिनेटमा भने चितवनले अग्रता बनायो। सुमित श्रेष्ठले अजामद अब्दुल्लाहसँग खोसेर दिएको पासमा अन्जन विष्टको प्रहार डिफेन्डरलाई डिफ्लेक्ट भयो। सो बललाई शिशिरले टोरिक जेब्रिनलाई दिए। उनले क्लोज रेन्जबाट गोल गरे।

१-० ले पछि परेको झापाका अल्हाजी गेरोले फ्री हेडर मिस गरे। झापाले बराबरी गोल फर्काउने मौका गुमायो। पहिलो हाफमा चितवनले १-० को अग्रता बनायो।

चितवनले पहिलो खेलमा पोखरा थन्डर्सलाई २-० र अर्को मा बुटवल लुम्बिनीलाई १-० ले हराएको थियो। उसँग ६ अंक छ।

झापाले पहिलो खेलमा बुटवलसँग र दोस्रो खेलमा काठमाडौंसँग गोल रहित बराबरी खेलेको थियो। उसँग २ अंक रहेको छ।