काठमाडौं (हाम्रो खेलकुद) – साहित्यकार क्षेत्रप्रताप अधिकारी स्मृति दिवसमा नेपाली राष्ट्रिय महिला टिमकी सशक्त मिडफिल्डर रेनुका नगरकोटी युवा प्रोत्साहन पुरस्कार २०८१ बाट सम्मानित भएकी छन् ।

एनसीएम डेमा आयोजित कार्यक्रममा रेनुकालाई साहित्यकार विप्लप प्रतिक, गुरूकुल एजुकेशन फाउन्डेसनका अध्यक्ष विनोद दवाडी, एनसिएमका प्रिन्सिपल सुशिल भक्त माथेमा र गुरूकुल एजुकेशन फाउन्डेसनका कोषाध्यक्ष अमन प्रताप अधिकारीले सम्मान गरे । रेनुका नगद ५० हजार रुपैयाँसहित सम्मानित भएकी हुन् ।

नेपाली राष्ट्रिय फुटबल टिमकी पुर्व राष्ट्रिय कप्तान रेनुकाले १८ वर्षको लामो खेल करियरमा ब्यक्तिगत रूपमा पहिलो पटक सम्मानित हुन पाउँदा निकै खुशी लागेको बताइन् । यो सम्मानको लागि उनले क्षेत्रप्रताप अधिकारीका सुपुत्र समेत रहेका अमन प्रताप अधिकारीलाई विशेष धन्यवाद दिइन् ।

रेनुकाले सन् २०१० बाट राष्ट्रिय टिममा डेब्यु गरेकी हुन् । साफ च्याम्पियनसीप र दक्षिण एसियाली खेलकुदमा उनको भुमिका महत्त्वपुर्ण रहँदै आएको छ । उनी नेपाली फुटबलकी प्रेरणादायी र हार नमान्ने सशक्त खेलाडीको रूपमा चिनिन्छिन् ।

सन् २०१६ साफयता कप्तान रहेकी रेनुका बीचमा चोटका कारण मैदानबाहिर पनि रहिन् । दुई पटकको चोट पछि उनले गरेको डेब्यु र कमब्याक तारिफयोग्य छ । सम्मानपछि कमब्याकमा साथ दिएकोमा राष्ट्रिय टिमका प्रशिक्षकलाई पनि धन्यवाद दिइन् ।

रेनुकाले घरेलु फुटबल नेपाल एपिएफ क्लबबाट खेल्दै आएकी छिन् ।