काठमाडौं( हाम्रो खेलकुद) – एनसेल नेपाल सुपर लिग (एनएसएल) मा धनगढी एफसी र पोखरा थन्डर्सबीचको खेल जारी छ। पहिलो हाफ गोल रहित बराबरीमा सकिएको छ।

दुवै टोली दोस्रो जितको खोजीमा थिए। तर पहिलो हाफमा दुवै टिमले उत्साहजनक प्रदर्शन गर्न सकेनन्। उत्कृष्ट मुभ बन्न नसक्दा पहिलो हाफ फितलो रहयो। तुलनात्मक रूपमा धनगढीले केहि मौका सिर्जना गर्यो।

खेलको आठौं मिनेटमा पोखराले अग्रता बनाउने मौकालाई सदुपयोग गर्न सकेन्। सुरज ज्यु ठकुरीको क्रसमा समिर तामाङको फ्रि हेडर क्रसबार माथीबाट बाहिरियो।

१२ औं मिनेटमा धनगढी पनि चुक्यो। सर्जियो बारबोजाको क्रसमा दीपेश राईले बललाई भेट्टाउन सकेन्। ३५ औं मिनेटमा सर्जियोले पहिलो बारमा हानेको प्रहारलाई पोखराका गोल रक्षक गिलेम प्रिसोले उत्कृष्ट बचावट गरे।

४३ औं मिनेटमा पनि गोलकिपर प्रिसो बाधक बने। रणदीप पौडेलको पासमा बक्स भित्रबाट दीपेश राईले हानेको प्रहारलाई प्रिसोले बचाइदिए। पहिलो हाफ गोल रहित बराबरीमा सकियो।

धनगढीको यो तेस्रो खेल हो। यसअघि उसले पहिलो खेलमा बुटवल लुम्बिनी एफसीलाई ४-१ ले हराएको थियो। दोस्रो खेलमा भने ललितपुर एफसीसँग गोल रहित बराबरीमा रोकिएको थियो। धनगढीसँग ४ अंक रहेको छ।

चौथो खेल खेलिरहेको पोखरासँग ३ अंक रहेको छ। पहिलो खेलमा चितवन एफसीसँग २-० र दोस्रो खेलमा ललितपुर सिटी एफसीसँग ३-२ ले हारेको थियो।

लगातारको दुई हारपछि पोखराले काठमाडौं रेजर्सलाई २-० ले हराउँदै प्ले अफको संभावनालाई कायमै राखेको थियो।