काठमाडौं (हाम्रो खेलकुद)- सहिद स्मारक बी डिभिजन लिगमा आज झापा फुटबल क्लब र ब्रिगेड ब्वाइज क्लब (बिबिसी) विजयी भएका छन्।

झापाले रानी पोखरी कर्नर टिम (आरसीटी) लाई २-१ गोल अन्तर हरायो। उसको यो लगातार दोस्रो जित हो। २० औं मिनेटमा प्रदीप बुढाथोकीले पेनाल्टीमा गोल गर्दै पहिले अग्रता बनायो।

४२ औं मिनेटमा झापा अग्रता दुगुना गर्न सफल रह्यो। उसको लागि मनिष लिम्बुले गोल गरे। पहिलो हाफमा झापा २-० ले अगाडि बढ्यो।

२-० पछि परेको आरसीटीको लागि प्रज्वल गुरूङले ५५ औं मिनेटमा एक गोल फर्काए। यो सँगै आरसीटीले खेलमा फर्कने संकेत देखायो। तर त्यसपछि दुवै टिमबाट गोल भएन।

लगातारको दोस्रो जितमा झापाले ७ अंकका साथ लिगको पाँचौ स्थानमा उक्लिएको छ। झापाले ५ खेलमा २ जित, १ बराबरी र २ हारमा ७ अंक बनाएको हो।

पाँचौं खेलमा आरसीटीको यो तेस्रो हार हो। १ जित र १ बराबरीपछि उसले मात्र ४ अंक बनाएको छ। आरसीटी १२औं स्थानमा झरेको छ।

आजै भएको अर्को खेलमा बिबिसीले टुसाल युथ क्लबलाई १-० ले हरायो। ८७ औं मिनेटमा विजय उरानले गरेको गोल खेलको निर्णायक बन्यो।

जारी लिगमा बिबिसीको यो दोस्रो जित हो। उसले यसअघि २ खेल हार्दा १ खेल बराबरी खेलेको थियो। आजको जितपछि ७ अंकका साथ लिगको छैटौं स्थानमा उक्लियो।

टुसालले यो हारमा तेस्रो स्थानमा उक्लने मौका गुमायो। टुसालसँग ६ अंक छ। यसअघि टुसालले ३ खेलमा बराबरी नतिजा निकाल्दा १ खेल हारेको थियो।