काठमाडौं (हाम्रो खेलकुद) – तेस्रो संस्करणको एनसेल एनएसएलमा ललितपुर सिटी एफसी र चितवन एफसीबीचको खेल जारी छ । पहिलो हाफको समाप्तीमा ललितपुरले १-० को अग्रता बनाएको छ । उसको लागि इमोह इजेकियलले गोल गरे ।

दशरथ रङ्गशालामा आज चितवन तेस्रो जित निकाल्दै शीर्षस्थानमा कायमै रहने दाउमा छ । ललितपुर भने दोस्रो जितको खोजीमा छ। आज ललितपुरले चितवनलाई हराए लिगको शीर्षस्थानमा उक्लने अवसर पनि ललितपुरलाई रहेको छ।

पहिलो हाफमा ललितपुरले खेलमा पकड बनायो । चितवनले भने कमजोर प्रदर्शन गरेको छ । खेलको दोस्रो मिनेटमा ललितपुरले गोल गर्ने मौका गुमायो । पापा इबाउ केबेले गोल रक्षक अमल नाइटसँगको वान भर्सेस वानमा गोल गर्न सकेनन् । गोलरक्षक नाइटले उनको प्रहार रोके ।

तर तेस्रो मिनेटमा नै ललितपुरले अग्रता बनायो । मणि कुमार लामाले करिब ३० यार्ड टाढाबाट हानेको फ्रि-किकमा इमोह इजेकियलले हेडर दोस्रो बारमा सुन्दर गोलमा परिणत भयो ।

१२ औं मिनेटमा ललितपुरले अग्रता दोब्बर पार्ने अवसर गुमायो । आदित्य शाक्यले बलमा मणि कुमार लामाले बक्स बाहिरबाट हानेको पावरफुल सटलाई चितवनका गोल रक्षक अमल नाइटले बचाए ।

चितवनले आकर्षक मुभ बनाउन नै सकेन । पहिलो हाफको इन्जुरी समयको पहिलो मिनेटमा शिशिर लेखीको क्रसमा भिक्टर मानसरेको हेडरलाई ललितपुरका गोल रक्षक जाफ्रे बाल्टसले सजिलै बचाए । पहिलो हाफमा ललितपुरले १-० को अग्रता बनायो ।

अंक तालिकाको शीर्षस्थानमा रहेको चितवनले यसअघि पोखरा थन्डर्सलाई २-० र बुटवल लुम्बिनीलाई १-० ले हराउँदा झापा एफसीसँग १-१ गोलको बराबरीमा रोकिएको थियो। चितवनसँग ७ अंक रहेको छ ।

ललितपुरले भने पोखरालाई ३-२ ले हराउँदस काठमाडौंसँग २-२ को बराबरी र धनगढीसँग गोल रहित बराबरी खेलेको थियो। ललितपुरसँग ५ अंक रहेको छ ।