काठमाडौं (हाम्रो खेलकुद) – एनसेल नेपाल सुपर लिग (एनएसएल) अन्तर्गत झापा एफसी र पोखरा थन्डर्सबीच जारी खेलको पहिलो हाफ गोलरहित बराबरीमा सकिएको छ ।

दशरथ रंगशालामा पोखराले तुलनात्मक रुपमा बढी अवसर सिर्जना गरेपनि गोल भने गर्न सकेन । दुवै टोलीले चोटको कारण पहिलो हाफमा नै खेलाडी परिवर्तन गरेका छन् ।

खेलको १३ औं मिनेटमा पोखराले अग्रता लिने सुवर्ण अवसरको सदुपयोग गर्न सकेन । सुदिल राईले अफसाइड ट्रयाप बिट गरेर वन भर्सेस वनको स्थितिमा गरेको प्रहार गोलरक्षक नेमान्जा लेमजिचले खुट्टाले बचाए । लगत्तै स्टेफन बिनोङले झापाका डिफेन्डरले क्लियर गर्न नसकेको बललाई पेनाल्टी क्षेत्र भित्रबाट पोस्टतर्फ प्रहार गर्न सकेनन् ।

१९ औं मिनेटमा पोखराले पुन: अर्को अवसर खेर फाल्यो । कप्तान आयुष घलानले वन भर्सेस वनमा लेमाजिचलाई बिट गर्न सकेनन् । ऊक्त बचाउ गर्ने क्रममा लेमाजिच घाइते भएपछि एन्जल श्रेष्ठले उनलाई प्रतिस्थापन गरे । २५ औं मिनेटमा जो आइडुले झन्डै ३० यार्ड टाढाबाट गरेको फ्रिकिक प्रहार क्रसबारमा छुँदै बाहिरियो ।

३६ औं मिनेटमा झापाले अर्को अवसर पायो । लाकेन लिम्बूको कर्नरमा आशिष गुरुङको हेडर पोस्टभन्दा थोरै माथिबाट गयो । पोखराले पहिलो हाफको ५ मिनेट बाँकी हुँदा सुदिल राईको स्थानमा सुरज ज्यु ठकुरीलाई मैदान पठाएको छ ।

अंक तालिकामा पोखरा ४ खेलमा ४ अंकसहित पाँचौ स्थानमा छ । झापा ३ खेलमा ३ अंक जोड्दै छैटौंमा छ ।