काठमाडौं (हाम्रो खेलकुद)– माल्दिभ्सको क्लबबाट व्यवसायिक खेल जीवन अघि बढाइरहेका राष्ट्रिय फुटबल टोलीका गोलकिपर किरण चेम्जोङले सिजनको पहिलो प्रतियोगितामै प्रभावशाली प्रदर्शन गरेका छन् ।

माल्दिभ्सको पहिलो डिभिजन टोली टिम ट्रस्ट एन्ड केयर (टिसी) स्पोट्र्स क्लबलाई सोमबार बंगलादेशमा जारी शेख कमल अन्तर्राष्ट्रिय क्लब कपको फाइनलमा पुर्याउन किरणले महत्वपूर्ण भूमिका निर्वाह गरेका थिए । पूर्व क्लब लक्ष्मी हुन्डाई मनाङ मस्र्याङ्दी क्लबविरुद्ध उच्च प्रदर्शन गर्दै किरण म्यान अफ दी म्याच बने । उनले ५ सय अमेरिकी डलर प्राप्त गरेका थिए । टिसी स्पोर्ट्सले सेमिफाइनलमा मनाङलाई १–० ले हराउँदा किरणले दुईवटा निश्चित गोल रोकेका थिए । दोस्रो हाफमा मनाङका रोहित चन्द र ओलाडिपो ओलावाले अफिजको प्रहारलाई किरणले विफल पारेका थिए ।

एक बर्षका लागि क्लबमा आबद्ध २७ बर्षे किरण पुसको अन्त्यमा माल्दिभ्सको क्लबमा आबद्ध भएका थिए । क्लब माथिल्लो श्रेणीको धिवेही प्रिमियर लिग क्लब हो । सन् २०१५ देखि माथिल्लो डिभिजनमा उक्लिएको टोली २०१६ को लिग, एफए कप र प्रेसिडेन्ट्स कपमा दोस्रो भएको थियो ।

किरण माल्दिभियन क्लबबाट खेल्ने तेस्रो नेपाली फुटबल खेलाडी हुन् । यसअघि फरवार्डद्वय सन्तोष साहुखल र जुमनु राईले अल युथ लिंकेजबाट २००९ को लिग खेलेका थिए । किरणको लागि भने टिसी स्पोर्टस दोस्रो विदेश क्लब हो । उनी २०१० मा चटगाँउ अबाहानीबाट बंगलादेश प्रिमियर लिग खेलेका थिए । उनीसँगै टोलीमा सन्तोष र लोकबन्धु गुरुङ पनि थिए । घरेलु फुटबलमा मछिन्द्रबाट व्यवसायिक खेल जीवन सुरु गरेका किरणले लामो समय रुस्लान थ्री स्टार क्लबमका विताएका थिए । पछिल्लो एक बर्षयता उनी लक्ष्मी हुन्डाई मनाङ मस्र्याङ्दी क्लबमा आबद्ध थिए ।

किरण सम्मिलित नेपाली टोलीले चार महिना अघि मलेसियामा एएफसी सोलिडारिटी कप जितेको थियो । नेपालको अहिले सम्म ठूलो सफलतामा किरण पहिलो रोजाइमा थिए । सोलिडारिटी कपमा चारै खेल पोस्ट सम्हालेको उनले सेमिफाइनलमा लाउसविरुद्ध पेनाल्टी सुटआउटमा २ वटा पेनाल्टी रोकेका थिए । सोलिडारिटी कप जितेकै कारण २०१९ को एएफसी एसिया कपको छनोट खेल्ने अवसर पाएको छ ।