काठमाडौं (हाम्रो खेलकुद) – एनसेल नेपाल सुपर लिग (एनएसएल) अन्तर्गत झापा एफसी र पोखरा थन्डर्सबीचको खेल १-१ को बराबरीमा सकिएको छ । झापाको यो लगातार चौथो बराबरी हो ।

दशरथ रंगशालामा गोलरहित रहेको पहिलो हाफपछि दोस्रो हाफमा १-१ गोल सम्भव भयो । पोखराले स्टेफन समिर बिनोङको गोलमा अग्रता लिएको १२ मिनेटपछि लाजार आर्सिचले फ्रिकिकमा सुन्दर गोल गर्दै खेल बराबरीमा ल्याए ।

खेलको १३ औं मिनेटमा पोखराले अग्रता लिने सुवर्ण अवसरको सदुपयोग गर्न सकेन । सुदिल राईले अफसाइड ट्रयाप बिट गरेर वन भर्सेस वनको स्थितिमा गरेको प्रहार गोलरक्षक नेमान्जा लेमजिचले खुट्टाले बचाए । लगत्तै स्टेफन बिनोङले झापाका डिफेन्डरले क्लियर गर्न नसकेको बललाई पेनाल्टी क्षेत्र भित्रबाट पोस्टतर्फ प्रहार गर्न सकेनन् ।

१९ औं मिनेटमा पोखराले पुन: अर्को अवसर खेर फाल्यो । कप्तान आयुष घलानले वन भर्सेस वनमा लेमाजिचलाई बिट गर्न सकेनन् । ऊक्त बचाउ गर्ने क्रममा लेमाजिच घाइते भएपछि एन्जल श्रेष्ठले उनलाई प्रतिस्थापन गरे । २५ औं मिनेटमा जो आइडुले झन्डै ३० यार्ड टाढाबाट गरेको फ्रिकिक प्रहार क्रसबारमा छुँदै बाहिरियो ।

३६ औं मिनेटमा झापाले अर्को अवसर पायो । लाकेन लिम्बूको कर्नरमा आशिष गुरुङको हेडर पोस्टभन्दा थोरै माथिबाट गयो । पोखराले पहिलो हाफको ५ मिनेट बाँकी हुँदा सुदिल राईको स्थानमा सुरज ज्यु ठकुरीलाई मैदान पठाएको थियो ।

दोस्रो हाफको ५१ औं मिनेटमा पोखराले बिनोङको गोलमा अग्रता लियो । आयुषले मिडफिल्डबाट बल अघि बढाएर खेलेको पासलाई आइडुले फ्लिक गरेपछि बिनोङले बक्सभित्र लग्दै गोल गरे ।

५६ औं मिनेटमा बिनोङको अग्रता दोब्बर पार्ने प्रयासमा गोलरक्षक एन्जल बाधक बने । जो आइडुले मिडफिल्डबाट निकालेको सुन्दर पासलाई बिनोङले पहिलो टचमा बक्सभित्र रोक्दै गरेको प्रहार एन्जलको हातमा लग्दै क्रसबारमा लागेर बाहिरियो ।

६५ औं मिनेटमा झापाका लागि लाजार आर्सिचले फ्रिकिकमा गोल गर्दै खेल बराबरीमा ल्याए । पोस्टबाट झन्डै २५ यार्ड टाढा प्राप्त फ्रिकिकलाई आर्सिचले टप कर्नरमा गोल गर्दै गोलरक्षक एभ्स प्रिसोको डाइभलाई व्यर्थ बनाए ।

८१ औं मिनेटमा पोखराले अग्रता लिने अवसर सदुपयोग गर्न सकेन । आयुषले दिएको लब पासलाई अनमार्क रहेका जो आइडुले पेनाल्टी क्षेत्रभित्र नियन्त्रण गर्न खोज्दा एन्जलले बचाए । लगत्तै अर्कोतर्फ अभिनाश स्याङतानले पेनाल्टी क्षेत्र बाहिरबाट गरेको प्रहारलाई प्रिसोले दायाँतर्फ डाइभ दिँदै बचाए ।

८५ औं मिनेटमा आर्सिचले पेनाल्टी क्षेत्रबाहिर ४ डिफेन्डरलाई छलाउँदै गरेको प्रहार प्रिसोले रोके ।

यस नतिजासँगै पोखरा ५ खेलमा ५ अंकका साथ चौथो स्थानमा उक्लिएको छ । झापा भने ४ खेलमा ४ अंक जोड्दै छैटौं स्थानमा कायम रहेको छ ।