काठमाडौं (हाम्रो खेलकुद)- एनसेल नेपाल सुपर लिग (एनएसएल) मा ललितपुर सिटी एफसी तेस्रो जितकासाथ प्ले अफमा प्रवेश गर्न सफल भएको छ।

ललितपुरले लिगको पुछारमा रहेको बुटवल लुम्बिनी एफसीलाई २-० ले हरायो। ललितपुर प्ले अफमा पुग्ने पहिलो टोली बनेको छ।

ललितपुरको जितमा अनन्त तामाङ र सन्तोष खत्रीले गोल गरे। दशरथ रंगशालामा भएको खेलमा लिग चरणबाट बाहिरिसकेको बुटवल विरुद्ध ललितपुरले खेल अवधिभर दबाब बनायो।

खेलको आठौं मिनेटमा पापा इबाउ केबेले बक्सभित्रबाट हानेको एक्रोबेटिक सट बारमा लागेर फर्कियो। रिबाउन्डमा सन्तोषको प्रहार पनि बारमा नै लागेर फर्कियो।

१४ औं मिनेटमा पापा इबाउको पासमा इमोह इजेकियलको प्रहारलाई बुटवलका गोलरक्षक दीप कार्कीले पन्च गरेर बचाए। प्राप्त कर्नरमा मणि कुमार लामाको कर्नरमा केर्भेन्स बरल्फोर्टको प्रहार क्रस बार माथिबाट बाहिरियो।

केहि मौका गुमाएको ललितपुरले २३ औं मिनेटमा भने गोल गर्यो। मणिको कर्नरमा राष्ट्रिय टोलीका डिफेन्डर अनन्तको हेडरले जाली चुम्यो। ललितपुरले १-० को अग्रता बनायो।

१-० ले पछि परेको लुम्बिनीले २६ औं मिनेटमा बराबरी गोल फर्काउने मौका गुमायो। प्रदीप लामाको लेफ्ट फुटेट सटलाई ललितपुरका गोल रक्षक समित श्रेष्ठले डाइभ गर्दै बचाए।

३१ औं मिनेटमा लुम्बिनीले अर्को मौका गुमायो। फिलिपाको लङ क्रसमा केन्टा हाराले दोस्रो बारमा हानेको हेडर पोष्टमा लागेर फर्कियो। सो बललाई गोल रक्षक समितले रोके।

दोस्रो हाफ सुरु भएको तेस्रो मिनेटमा लुम्बिनीले गोल गर्ने राम्रो अवसर खेल फाल्यो। कप्तान एरिक बिष्टको क्रसमा सरोज तामाङले बललाई कन्ट्रोल गर्दै डिफेन्डरलाई छल्लाएर हानेको प्रहारलाई ललितपुरका गोलरक्षक समितले उत्कृष्ट बचावट गरे।

५१ औं मिनेटमा ललितपुरले अग्रता दुगुना बनाउने मौका खेर फाल्यो। पापा इबाउको लङ‌ पासमा इमोह इजाकियलले गोलरक्षक दीपलाई बिट गरेर हानेको प्रहार बाहिरियो।

८० औं मिनेटमा इमोहको प्रहारलाई गोल रक्षक दीपले बचाए। रिबाउन्डमा पापा इबाउले दिएको बलमस सन्तोष को प्रहारले सही दिशा लिन सकेन । तर यसपपछि खेल सकिन २ मिनेट बाकी छँदा ललितपुरले दोस्रो गोल गर्यो।

इमोहको पासमा सन्तोषले उत्कृष्ट शैलीमा बललाई कन्ट्रोल गर्दै बक्सको एजबाट हानेको पावरफुल सट सुन्दर गोलमा परिणत भयो। ललितपुरले बुटवललाई २-० ले माथ दियो।

अपराजित ललितपुरले ५ खेलमा ३ जित र दुई बराबरीको नतिजामा ११ अंक बनाएको छ। लिगको शीर्षस्थानमा उक्लन पनि सफल भएको छ। अब ललितपुरले लिग चरणको अन्तिम खेलमा झापासँग खेल्नेछ।

लिगको पुछारमा रहेको बुटवलले पाँचौं खेलमा पनि जित निकाल्न सकेन्। एक बराबरी र ४ हारमा बुटवलले मात्र १ अंक बनाएको छ।

आजै भएको पहिलो खेलमा पोखरा थन्डर्स र झापा एफसीबीचको खेल १-१ गोलको बराबरीमा सकिएको थियो।