सुमन अधिकारी, बुटवल

सिम्रिक युवा क्लबले आठौ भूपू सैनिक कप नकआउट फुटबल प्रतियोगिताको उपाधि जितेको छ ।

सोमवार भएको फाइनलमा आयोजक भूपू सैनिक स्पोर्टिङ क्लबलाई ३-१ ले पराजित गर्दै सिम्रिकले उपाधि चुमेको हो ।

भूूपू सैनिक जबई खेल मैदानमा भएको फाइनलको २० औं मिनेटमा सुरज चौधरीले पेनाल्टी मार्फत गोलको खाता खोलेका हुन् ।

विशाल शाहीले आफुलाई सुरजलाई डिबक्स भित्र फाउल गरेपछि प्राप्त पेनाल्टीलाई सुरजले गोल गरेका हुन्। ५२ औं मिनेटमा सिम्रिकका नीरबहादुर थापाले फ्रि किकमा गोल गरे ।

५५ औं मिनेटमा कप्तान अर्जुन चौधरीले पेनाल्टीमा गोल‌ गरेपछि सिम्रिकले ३-० को अग्रता बनायो । आयोजकका सन्जय खत्रीले अन्तिम समयमा सान्त्वना गोल फर्काए ।

भूपू सैनिक सालघारी समाजको संरक्षकत्व र भूपू सैनिक जबई स्पोर्टिङ्ग क्लबको आयोजनामा भएको प्रतियोगिताको विजेताले ट्रफीसहित २ लाख २२ हजार २ सय २२ र दोस्रो टोलीले १ लाख ११ हजार १ सय ११ रुपैयाँ प्राप्त गर्यो ।

सिम्रिकका अरुण चौधरी प्रतियोगिताको सर्वोत्कृष्ट खेलाडी घोषित भए । सिम्रिककै सरिन जिसी उत्कृष्ट गोलकिपर र सोही टोलीका सुरज चौधरी सर्वाधिक गोलकर्ता तथा भूपूका मनोज श्रेष्ठ उत्कृष्ट रक्षक र सोही क्लबका क्षितिजराज जेटी उत्कृष्ट मिडफिल्ड घोषित भए ।

विजेता र उपविजेता टोलीका खेलाडीलाई अखिल नेपाल फुटबल संघका केन्द्रीय उपाध्यक्ष दीर्घ बहादुर केसी, बुटवल नगरपालिका वडा नं १५ का वडाअध्यक्ष तथा नगर प्रवक्ता शिव राना, लुम्बिनी प्रदेश भलिबल संघका अध्यक्ष योग गुरुङ, आयोजक क्लबका अध्यक्ष गोपिराम पुनले पुरस्कृत गरे ।

अध्यक्ष पुनले खेल क्षेत्रमा योगदान गरेका पूर्व प्रशिक्षक, खेलाडीको सम्मानलाई निरन्तरता दिने बताए । प्रतियोगितामा रुपन्देहीका ६ र नवलपरासीका २ गरि ८ टोलीको सहभागिता थियो।