काठमाडौं (हाम्रो खेलकुद) – तेस्रो संस्करणको एनसेल सुपर लिग (एनएसएल) मा क्वालिफायरमा पुगिसकेको ललितपुर एफसी सिटी र बाहिरिसकेको झापा एफसीबीचको खेलको पहिलो हाफ गोलरहित बराबरीमा सकिएको छ ।

दशरथ रंगशालामा भएको यो खेलको नतिजाले लिगको कुनै पनि समिकरणलाई असर गर्दैन । अर्थहिन यो खेलमा ललितपुर अपराजित यात्रा कायम राख्न चाहन्छ भने झापा जितसहित सिजन अन्त्य गर्ने सुरमा छ । क्वालिफायरमा स्थान पक्का गरेको ललितपुरले कप्तान तथा डिफेन्डर अनन्त तामाङलाई विश्राम दिएको छ । आज सनिष श्रेष्ठले कप्तानको जिम्मेवारी सम्हालेका छन् ।

खेलको नवौं मिनेटमा ललितपुरले गोल गर्ने मौका गुमायो । आदित्य शाक्यले झापाका गोल किपर अन्जल श्रेष्ठसँगको वान भर्सेस वानमा मौका खेर फाले । आदित्यले बक्स बाहिरबाट गरेको चिप किपरले जम्प गर्दै रोके। आदित्यले पास दिएको भए अनमार्क दिपेश घले पनि थिए‌। खेलको १२ औं मिनेटमा ललितपुरका इमोह इजाकियलको प्रहारलाई गोल किपर अन्जल श्रेष्ठले बचाए ।

खेलको २४ औं‌ मिनेटमा झापाका आरसिस लजारको कर्नरमा अल्हाजी गेरोको हेडर क्रसबार माथीबाट बाहिरियो । पहिलो हाफ गोल रहित बराबरीमा सकियो ।

ललितपुर ३ जित र २ बराबरीमा ११ अंक सहित लिगको शीर्षस्थानमा रहेको छ। ४ बराबरी र १ हारमा झापासँग ४ अंक रहेको छ ।

जारी एनएसएलमा ललितपुर र धनगढी क्वालिफायर वानमा पुगिसकेका छन् । पोखरा थन्डर्स प्ले अफमा पुगिसकेको छ । अब भोलि हुने चितवन र धनगढीबीचको खेलले प्ले अफमा पुग्ने चौथो टिमको निर्णय गर्नेछ । चितवन र काठमाडौं मध्ये एक टिम प्ले अफमा पुग्नेछ ।