काठमाडौं (हाम्रो खेलकुद) – नेपाल सुपर लिग (एनएसएल) को पहिलो क्वालिफायरमा ललितपुर सिटी एफसीले शनिवार धनगढी एफसीविरुद्ध पाएको रातो कार्डको आयोजकसँग अपिल गर्ने भएको छ ।

खेल संचालन गरेका फिफा रेफ्री उमेश बिडारीले पहिलो हाफमा मणिकुमार लामालाई सिधा रातो कार्ड र खेलपछि पाप डियाकीटेलाई दोहोरो पहेंलो कार्ड दिएका थिए । दुवै निर्णयको विरुद्ध ललितपुरले अपिल गर्ने क्लबले विज्ञप्तिमार्फत जानकारी दिएको छ ।

‘प्रतियोगिताको स्तर बढाउन टिमको हिसाबले हामीले धेरै मिहिनेत गर्यौं । तर एनएसएल खेलाउने रेफ्रीको स्तरनै भएन,’ ललितपुर सिटीका प्रबन्ध निर्देशक आलोक जोशीले भने, ‘रेफ्रीको गलत निर्णयका कारण हाम्रा दुई महत्त्वपूर्ण खेलाडीले रातो कार्ड पाएका छन् । यो गलत निर्णयको विरुद्धमा हामीले कडा अपिल गर्नेछौं ।’

पहिलो हाफमै १० खेलाडीमा सिमित भएको ललितपुरले धनगढीलाई २-१ ले हराउँदै प्रतियोगिताको फाइनल पुगेको छ ।

तर रेफ्रीले दुई रातो कार्ड देखाएका कारण फाइनल खेलमा मणि र डियाकिटे उपस्थित हुने छैनन् । रेफ्रीको निर्णयमा अपिल गरेकाले आयोजकबाट निर्णय उल्टिए भने ती खेलाडी उपलब्ध हुनेछन् ।

खेलको सुरुवातमा धनगढीका मोहमद अल जाउनीबाट खराब ट्याकल बेहोरेका ललितपुरका मणिले उल्टै रातो कार्ड पाएका थिए । रेफ्रीकै स्तर र नियतमाथि अन्य टोलीले पनि प्रश्न उठाउँदै आएका छन् ।

यसअघि चितवन र पोखराले पनि सार्वजनिक रुपमै रेफ्रीको आलोचना गरेका थिए । विदेशी रेफ्री ल्याउन माग गरेपनि आयोजकले यसबारे मौन रहँदै आएको छ ।