काठमाडौं (हाम्रो खेलकुद) – नेपाल सुपर लिग (एनएसएल) अन्तर्गत ललितपुर सिटी एफसी र धनगढी एफसीबीच भएको पहिलो क्वालिफायर खेलमा रातो कार्ड प्राप्त गरेका मिडफिल्डर मणि लामाले फाइनल खेल्न पाउने भएका छन् ।

एनएसएलको आयोजक नेपाल स्पोर्ट्स एण्ड इभेन्ट म्यानेजमेन्टले ललितपुर सिटीलाई पत्र लेख्दै मणिले उक्त खेलमा पाएको रातो कार्ड रद्द गर्दै फाइनलका लागि उनी खेल्न योग्य रहेको बताएको छ । एनएसएलले लेखेको पत्रमा उक्त घटनामा मणिको कुनै गल्ती नदेखिएको प्रष्ट पारिएको छ ।

धनगढीविरुद्ध खेलको १५ औं मिनेटमा मोरक्कोका मिडफिल्डर मोहमद अल जाउनीले ललितपुरका मणिमाथि फल गर्दा रेफ्रीले मणिलाई रातो कार्ड दिँदै मोहमदलाई भने पहेंलो कार्ड मात्र देखाएका थिए । उक्त घटनामा फिफा रेफ्री उमेश विडारीमाथि भने एनएसएलले आन्तरिक समिक्षाका साथै अनुसन्धान पनि सुरु गरेको बताएको छ ।

यसबाहेक क्लबले डिफेन्डर पाप ज्याकिटेको रातो कार्डका लागि गरेको अपिल भने असफल भएको छ । रेफ्री विडारीले खेल सकिएपछि आक्रोशित देखिएका ज्याकिटेलाई दोहोरो पहेंलो कार्ड देखाउँदै रातो कार्ड दिएका थिए ।

एनएसएलले यससँगै ललितपुरको ओनर बक्समा अनुशासन कायम राख्न पनि भनेको छ । आयोजकले क्लबले अपिल गर्ने क्रममा प्रयोग भएको भाषालाई पनि रचनात्मक राख्न आग्रह गरेको छ ।