नेपालगञ्ज (हाम्रो खेलकुद )- विभागीय टोली नेपाल पुलिस क्लब लुम्बिनी कप अन्तर्राष्ट्रिय आमन्त्रण महिला फुटबल प्रतियोगिताको फाइनलमा प्रवेश गरेको छ ।

नेपालगन्ज रंगशालामा आज भएको पहिलो सेमिफाइनल खेलमा अर्को विभागीय टोली त्रिभुवन आर्मी फुटबल क्लबलाई सडन डेथमा पुलिस अन्तिम दुईमा पुगेको हो। पेनाल्टी सुट आउटमा बराबरीपछि पुलिस फाइनलमा प्रवेश गरेको हो ।

निर्धारित ९० मिनेटको खेलमा १-१ को बराबरीमा टुंगिएको थियो। २९ औ मिनेटमा मिना देउवाको गोलमा ग पुलिसले अग्रता लियो । ८० औं मिनेटमा आर्मीकी तुलसा बोहोराले बराबरी गोल गरिन् ।

त्यसपछि पेनाल्टी सुट आउटमा पुलिसकी रेविका पाण्डे, उषा नाथ, निरु थापा, सुष्मा तामाङ, अनुष्का शेर्पा र अमृता जैसीले पेनाल्टी गोल गरे । मोनिका पुलामी मगर, मिना देउवा र समीक्षा घिमिरेले गोल गर्न चुके ।

यस्तै आर्मीकी तुलसा बोहरा, हिमा चौधरी, सपना लामा, बिमला विक र सुखरिया सुक्लखुले गोल गरे। अंचली वाइवा, चन्द्रा भण्डारी, सुनिता चौधरी र इन्दिरा राईले गोल गर्न सकेनन् ।

पुलिसकी गोलकिपर उषा नाथ प्लेयर अफ द म्याच घोषित भइन्। गोलकिपर उषालाई नेपाल पत्रकार महासंघ लुम्बिनी प्रदेशका अध्यक्ष शुक्रक्रृषी चौलागाई ,चार नम्बर बाहिनी पति सहायक रथि बिक्रम राणा र के आइ इ सी नेपालगन्ज प्रमुख शुभास थापाले संयुक्त रुपमा ५ हजार रुपैयाँ प्रदान गरे।

प्रतियोगिताको दोस्रो सेमिफाइनलमा एपिएफ र रौतहट फुटबल संघबीच प्रतिस्पर्धा हुनेछ। बाँके जिल्ला फुटबल सङ्घसँगको सहकार्यमा भइरहेको प्रतियोगिताको विजेताले ५ लाख ५ हजार ५ सय ५५ रुपैयाँ र दोस्रो २ लाख ५० हजार रुपैयाँ प्राप्त गर्नेछ।