काठमाडौं (हाम्रो खेलकुद)- प्रधानमन्त्री केपी शर्मा ओली र ब्राजिलका महान् फुटबल खेलाडी रोबर्टाे कार्लाेसबीच आज भेटघाट भएको छ ।

सिंहदबारस्थित प्रधानमन्त्री तथा मन्त्रिपरिषद्को कार्यालयमा उनीहरुबीच भेट भएको हो ।

प्रधानमन्त्री ओलीले खेलाडी कार्लाेसलाई स्वागत गर्दै उनको नेपाल आगमनले यहाँका खेलाडी र युवाहरुलाई उत्साह मिल्ने बताए।

प्रधानमन्त्री ओलीले कार्लाेसलाई माउन्टेन फ्ल्याइट र जंगल सफारी गर्ने योजनासहित पुनः नेपाल भ्रमणमा आउन आग्रह गरे ।

आफूलाई स्वागत गरिएकामा आभार व्यक्त गर्दै कार्लाेसले नेपालका प्रधानमन्त्री, युवा र खेलाडीसँग भेट्न पाउँदा खुसी लागेको बताए ।

हिजो नेपाल आइपुगेका कार्लोस आज नेपाल सुपर लिग (एनएसएल) को दोस्रो क्वालिफायरको प्रमुख अतिथिको रुपमा दशरथ रंगशाला जानेछन्। ब्राजिलले सन् २००२ मा‌ पछिल्लो पटक विश्व कप जित्दा कार्लोस टोलीका सदस्य थिए।

उक्त भेटमा एनएसएलको आयोजक नेपाल स्पोर्ट्स एण्ड इभेन्ट म्यानेजमेन्टका पदाधिकारीहरुको पनि उपस्थिति थियो।

एनएसएलको आज साँझ ६ बजे सुरु हुने दोस्रो क्वालिफायरमा धनगढी एफसी र पोखरा थन्डर्सबीच हुनेछ ।

पहिलो क्वालिफायरमा ललितपुर सिटी एफसीसँग पराजित भएको धनगढी र इलिमिनेटरमा एफसी चितवनलाई पराजित गरेको पोखराबीच आजको भेट तय भएको हो ।

आजको विजेताले शनिवार तेस्रो संस्करणको फाइनलमा साविक विजेता ललितपुरको सामना गर्नेछ।