एजेन्सी – च्याम्पियन्स लिगको दोस्रो सेमिफाइनलको पहिलो लेग बार्सिलोना र इन्टर मिलानबीच प्रतिस्पर्धा हुँदैछ। खेल नेपाली समयअनुसार आज राति १२:४५ बजे सुरु हुनेछ।

रियल म्याड्रिडलाई हराउँदै कोपा डेल रे उपाधि जितेपछि बार्सिलोना आज राति मोन्टजुइक ओलम्पिक स्टेडियममा इन्टर मिलानविरुद्धको च्याम्पियन्स लिग सेमिफाइनलको पहिलो लेग खेल्न मैदान उत्रन लागेको हो।

रियललाई हराएपछि बार्सिलोना अहिले उत्साही र आत्मविश्वासी बनेको छ। रियलविरुद्ध १२० मिनेटको कडा भिडन्त पश्चात बार्साका लागि यो खेल बुधबार भएको कारण एक दिनको विश्राम पायो, जसले उनीहरूलाई केही आराम दिएको छ।

इन्टर अहिले खराब लयबाट गुज्रिरहेको छ। १३ वर्षभन्दा बढी समयपछि इन्टरले लगातार तीन खेल गोल नगरी गुमाएको छ।

च्याम्पियन्स लिगको क्वार्टरफाइनलमा बायर्न म्युनिखसँग २-२ को बराबरीपछि इन्टरले सिरी ‘ए’ मा बोलोन्या र रोमासँग तथा इटालियन कपमा एसी मिलानसँग १–० को हार बेहोरेको छ।

त्यसैले इन्टर सिरी ‘ए’ तालिकामा शीर्ष स्थानबाट तल झरेको छ। नयाँ लिग लिडर नापोलीभन्दा ३ अंकले पछाडि परिसकेको छ।

‘यी तीन हारले पीडा दिएको छ, हामी यस्ता पराजयको बानी टिम होइनौं। अब शारीरिक तथा मानसिक रूपमा फर्कन जरुरी छ,’ प्रशिक्षक इन्जाघीले भने।

यी तीनै खेलमा मार्कुस थुराम अनुपस्थित थिए। चोटका कारण बाहिर रहेका थुरामले यो सिजन इन्टरका लागि सबै प्रतियोगितामा १७ गोल र ९ असिस्ट गरेका छन्। तर थुराम प्रशिक्षणमा फर्किएका छन् र उनी आजको खेलमा सुरूवाती टोलीमै देखिन सक्छन्।

हिजो भएको पहिलो सेमिफाइनलको पहिलो लेगमा पेरिस सेन्ट-जर्मनले आर्सनललाई १-० ले हराएको थियो।