ममताको ५ गोल‌मा संकटाको सहज जित

रविन्द्र वाईबा, हेटौंडा

संकटा क्लबले मकवानपुर महिला राष्ट्रिय गोल्डकप फुटबल प्रतियोगितामा सहज जित निकालेको छ ।

हेटौंडा-६ स्थित गौरीटार रंगशालामा शनिवार भएको खेलमा सिमराको नवजनजागृती युवा क्लबलाई ६-१ गोलले हराउँदै संकटाले सेमिफाइनलको यात्रा तय गरेको छ।

संकटालाई जित दिलाउन ममता पुन मगरले उत्कृष्ट प्रदर्शन गरिन् । उनले व्यक्तिगत ५ गोल गरिन् । उनले खेलको पहिलो हाफको नवौं, २१ औं, ३५ औं मिनेटमा ह्याट्रिक पूरा गरिन् ।

ममताले दोस्रो हाफको २७ औं र ८४ औं मिनेट गोल गरिन् । योसँगै ममता प्रतियोगितामा ह्याट्रिक गर्ने पहिलो खेलाडी बनिन् ।

संकटाका लागि अर्को एक गोल जेनिफर राना मगरले खेलको पहिलो हाफको १३ औं मिनेटमा गोल गरिन् । सिमराकी रोजिना लामाले खेलको ७९ औं मिनेटमा एक गोल फर्काइन् ।
५ गोल गरेकी संकटाकी ममता प्लेयर अफ दि म्याच घोषित भइन् । उनले १० हजार रुपैयाँ प्राप्त गरिन्।
अब संकटाले एपिएफ र वीरगंज युथ स्पोर्ट्सबीचको विजेतासँग सेमिफाइनल खेल्नेछ।

प्रतियोगितामा आइतवार नेपाल पुलिस क्लब र रौतहट जिल्ला फुटबल संघबीच प्रतिस्पर्धा हुनेछ। प्रतियोगिताको विजेताले ५ लाख र दोस्रो टोलीले ३ लाख रुपैयाँ प्राप्त गर्नेछ ।