बट्टार/नुवाकोट (हाम्रो खेलकुद)- एपिएफ फुटबल क्लबकी रेनुका नगरकोटे बागमती प्रदेश मुख्यमन्त्री कप राष्ट्रिय महिला फुटबल प्रतियोगीताको सर्वोत्कृष्ट खेलाडी घोषित भएकी छिन्।

विजेता टोलीकी रनुकाले १५ हजार रुपैयाँ प्राप्त गरिन् ।३ गोलसहित एपिएफकी अनिता केसीले सर्वाधिक गोलकर्ताको अवार्ड जितिन् । व्यक्तिगत अवार्डमा एपिएफको वर्चस्व रहँदा अन्जना राना मगर उत्कृष्ट गोलकिपर घोषित भइन्।

एपिएफलाई उपाधि दिलाएका जिवेश पाण्डे उत्कृष्ट प्रशिक्षक चुनिए। दोस्रो भएको नेपाल पुलिस क्लबकी साहारा लिम्बु उदयीमान खेलाडी बनिन्। उनीहरू सबैलाई जनही १० हजार रुपैयाँ प्राप्त गरे ।

आज भएको फाइनलमा पुलिसलाई १-० ले हराउँदै एपिएफले उपाधि जितेको थियो। लगातार दोस्रो सातामा एपिएफको‌ यो दोस्रो उपाधि हो। वैशाख १२ गते नेपालगन्जमा भएको लुम्बिनी कपमाको‌ फाइनलमा पनि एपिएफले पुलिसलाई‌ हराएको थियो।

पछिल्लो ४ महिनामा एपिएफले एन्फा लिग सहित ५ वटा उपाधि जितेको छ। लिग पछि इलाम र चितवनमा पनि एपिएफ च्याम्पियन बनेको थियो।

नुवाकोट जिल्ला खेलकुद विकास समितिको मुख्य आयोजना तथा नुवाकोट जिल्ला फुटबल संघ सहयोगमा प्रतियोगिता बैशाख १३ गते सुरु भएको थियो।

बागमती प्रदेश खेलकुद परिषदले मुख्य संरक्षक र विदुर नगरपालिका संरक्षक प्रतियोगितामा ३ विभागीय टोलीसहित ८ टोलीको सहभागिता थियो।