रविन्द्र वाईबा, हेटौंडा

नेपाल पुलिस क्लब मकवानपुर महिला राष्ट्रिय गोल्डकप फुटबल प्रतियोगिताको सेमिफाइनलमा प्रवेश गरेको छ ।

आइतबार हेटौंडा-६ स्थित गौरीटार रंगशालामा भएको खेलमा रौतहटको महिला टिमलाई टाइब्रेकरमा ४-२ गोलले हराउँदै पुलिसले सेमिफाइनलमा आफ्नो स्थान सुरक्षित गरेको हो ।

निर्धारित खेल समय गोलरहित बराबरीमा रोकिएपछि खेलको नतिजा टाइब्रेकरबाट लिइएको हो । रौतहटको लागि टाइब्रेकरमा रेविका पाण्डे, निरु थापा, उषा नाथ र सरु वाईबाले गोल गरिन् । गिम कुमारी गुरुङको प्रहार बाहिरिइन् ।

रौतहटका लागि सविना चौधरी र सलोनी राना गरिन् भने मनिषा श्रेष्ठ र अञ्जली चन्दकी प्रहार पुलिसकी गोलरक्षक उषा नाथले सेभ गरिन् । पुलिसकी गोलरक्षक उषा नाथ प्लेयर अफ दि म्याच घोषित भइन् । उनले १० हजार रुपैयाँ प्राप्त गरिन्।

यो सँगै पुलिस गोल्डकपको सेमिफाइनलमा प्रवेश गर्ने तेस्रो टोली बनेको छ । पुलिसले सेमिफाइनलमा चितवनसँग प्रतिस्पर्धा गर्नेछ । यस अघि आयोजक मकवानपुरलाई हराउँदै चितवन सेमिफाइनलमा प्रवेश गरिसकेको छ ।

प्रतियोगितामा सोमवार एपिएफ र वीरगंज युथ एकेडेमीबीच प्रतिस्पर्धा हुनेछ । प्रतियोगिता फाइनल बुधबार हुनेछ । प्रतियोगिताको विजेताले ५ लाख र दोस्रो खेल ३ लाख रुपैयाँ शिल्ड, मेडल र प्रमाणपत्र प्राप्त गर्नेछ ।