रविन्द्र वाईबा, हेटौंडा

एपिएफ मकवानपुर महिला राष्ट्रिय गोल्डकप फुटबल प्रतियोगितामा फाइनलमा प्रवेश गरेको छ।

हेटौंडा-६ स्थित गौरीटार रंगशालामा मंगलवार भएको दोस्रो सेमिफाइनलमा संकटालाई २-० गोलले हराउँदै एपिएफ अन्तिम दुईमा पुगेको हो ।

एपिएफलाई जित दिलाउन रश्मि कुमारी घिसिङले ७१ औं मिनेटमा र अनिता केसीले ७६ औं मिनेटमा गोल गरिन् ।

रश्मिले कप्तान अनिता बस्नेतको कर्नरलाई हेडमार्फत गोल गरिन् ।‌ अनिता केसीले पनि अनिता बस्नेतकै असिष्टमा गोल गरेकी हुन् ।

योसँगै रश्मि गोल्डकपमा सर्वाधिक गोलकर्ताको शीर्ष स्थानमा छिन् । उनले २ खेलमा ६ गोल गरेकी छिन् । खेलमा उत्कृष्ट प्रदर्शन गरेकी एपिएफकी रेनुका नगरकोटे प्लेयर अफ दि म्याच घोषित भइन् र उनले १० हजार रुपैयाँ प्राप्त गरिन् ।

दोस्रो हाफमा आफुलाई सम्हाल्न नसक्दा संकटा प्रतियोगिताबाट बाहिरिएको छ। अब एपिएफले उपाधिका लागि अर्को विभागीय टोली नेपाल पुलिस क्लबसँग प्रतिस्पर्धा गर्नेछ ।

फाइनल बिहीवार दिउँसो ३ बजे हुनेछ । पुलिस मंगलबार नै भएको पहिलो सेमिफाइनलमा चितवनलाई ७-० फराकिलो गोलान्तरले हराउँदै फाइनल प्रवेश गरिसकेको छ ।

प्रतियोगिताको विजेताले ५ लाख र उपविजेताले ३ लाख रुपैयाँ प्राप्त गर्नेछ । यस्तै सर्वोत्कृष्ट खेलाडीले स्कुटर प्राप्त गनेछ भने अन्य विधागत उत्कृष्टले २५ हजार रुपैयाँ प्राप्त गर्नेछन् ।