काठमाडौं (हाम्रो खेलकुद)- प्लानिङ ब्वाइज युनाइटेड २ खेल अगाडि ‘ए’ डिभिजनमा उक्लन सफल भएको छ। बाँसबारी क्लबलाई २-० ले हराउँदै प्लानिङ ब्वाइज शीर्ष डिभिजनमा उक्लिएको हो।

यो जितमा प्लानिङ ब्वाइजले ११ खेलबाट २७ अंक बनाएर २ खेल अगावै शीर्ष दुईमा रहने निश्चित भएको हो।

एन्फा कम्प्लेक्समा भएको खेलमा प्लानिङ ब्वाइजलाई बाँसबारीले पहिलो हाफमा गोल गर्न रोक्यो। पहिलो हाफ गोल रहित बराबरीमा सकियो।

खेलको ४७ औं मिनेटमा लङ पासमा बाँसबारीका गोल किपर सन्दीप राउतको गल्तीमा आत्मघाती गोल भयो। उनको टाउकोमा लाग्दै गोलमा परिणत भयो। आत्मघाती गोल उपहार पाएपछि प्लानिङ ब्वाइजले १-० को अग्रता बनायो।

खेलको ८२ औं मिनेटमा पुजन थापाले गोल गरे। यो गोलमा प्लानिङ ब्वाइज २-० को जित दर्ज गर्न सफल रहयो।

यो सँगै ए डिभिजनमा उक्लन सफल भयो। सन् २०२२ मा बी डिभिजनमा उक्लिएको थियो। तीन वर्षको छोटो अवधिमा बीबाट प्लानिङ ब्वाइज ए‌ डिभिजनमा उक्लिन सफल भएको हो।

११ खेलमा ८ जित र ३ बराबरी नतिजामा प्लानिङ ब्वाइजले २७ अंक जोडेको छ। २ क्लब ए डिभिजनमा उक्लने छन्। १० खेल खेलेको श्री भगवतीसँग २२ अंक छ। अब उसले बाँकी तीन खेलमा ३ अंक बनाएको खण्डमा ए‌ डिभिजनमा उक्लने छ।

बाँकी अन्य क्लबले भने बाकी खेलहरूबाट २७ अंक जोड्न सक्दैन । यही कारण प्लानिङ ब्वाइजले ए‌ डिभिजनमा स्थान बनाएको हो।