बार्सिलोना (एजेन्सी)– बार्सिलोनाका प्रशिक्षक लुइस इन्रिके सम्झौताको अन्त्यसँगै क्लब छाड्ने प्रष्ट पारेका छन् । सिजनको अन्त्यमा क्लबसँगको उनको सम्झौता सकिदैछ ।

‘ अर्को सिजन म बार्सिलोनाको प्रशिक्षक रहन्न,’ ला लिगामा स्पोर्टिङ गिजोनलाई बुधबार राती ६–१ ले हराएपछि पत्रकारसँग उनले निर्णय सुनाए, ‘ म प्रति देखाएको विश्वासका लागि र यो तीन बर्षे कार्यकाल अविस्मरणीय रहेकामा म क्लबलाई धन्यवाद दिन चाहन्छु ।

उनले सिजनको सुरुआतमै सम्झौता नविकरणको सम्भावना नरहेको बताएको थिए । उनले भने‘क्लबले मलाई हतार नगर्न सुझाव दिएको थियो । तर अब मलार्य लाग्छ यो निर्णय लिने सही समय हो ।’ बार्सिलोनाको प्रशिक्षकका रुपमा काम गर्दा निकै ठूलो जिम्मेवारी रहने उल्लेख गर्दै उनले भने, ‘ दिनमा २/३ घण्टा मात्र आराम गर्न पाइन्छ । म यो दबाबबाट केही समय विश्राम लिन चाहन्छु ।’

बार्सिलोनाका पूर्व खेलाडी समेत रहेका इन्रिकेले सन् २०१४ मार्चमा क्लबको कमान सम्हालेका थिए । उनको नेतृत्वमा क्लबले २०१४/१५ मा च्याम्पियन्स लिग , ला लिगा र कोपा डेल रे गरी तेहेरो उपाधि दिलाएका थिए ।