एजेन्सी – क्रिस्टियानो रोनाल्डोले साउदी प्रो लिग क्लब अल-नसरसँग नयाँ दुई वर्षे सम्झौता गरेपछि अब उनले वार्षिक १ सय ७८ मिलियन पाउण्ड (नेपाली ३० अर्ब २६ करोड रुपैयाँ ) भन्दा बढी आम्दानी गर्ने निश्चित भएको छ।

केही हप्ता अघिसम्म साउदी क्लब अल-नसरसँगको उनको यात्रा समाप्त भएको संकेत गरिएको थियो ।रोनाल्डोले बिहीवार फेरि त्यही क्लबसँग दुई वर्षका लागि नयाँ सम्झौता गर्दै युरोपेली फुटबलमा फर्किने अडकलबाजीलाई पूर्णविराम दिएका छन्।

पछिल्ला दुई सिजनमा साउदी प्रो लिगमा सर्वाधिक गोलकर्ता भए पनि उनले क्लबलाई उपाधि दिलाउन सकेका छैनन्। निराशाजनक प्रदर्शनका कारण क्लब फिफा क्लब विश्वकपका लागि समेत छनोट हुन सकेन।

अल-नसरसँग लगातार असफल भएपछि रोनाल्डोले आफ्नो करिअरको बाँकी समय अन्य क्लबमा बिताउने सोच बनाएको  जस्तो अनुमान गरिएको थियो ।  तर पछिल्लो केही हप्तामा परिस्थितिमा परिवर्तन आएको छ।

अल-नसरले सामाजिक सञ्जालमार्फत घोषणा गरेअनुसार, ‘क्रिस्टियानो रोनाल्डो अब सन् २०२७ सम्म अल नसरमा रहनेछन्।’ त्यससँगै उनको नयाँ सम्झौतासम्बन्धी विवरण पनि बाहिर आएको छ।

सन्चारमाध्यमका अनुसार, रोनाल्डोले अल-नसरसँग वार्षिक १ सय ७८ मिलियन पाउण्ड (झन्डै ४ सय मिलियन युरो वा झन्डै नेपाली ३० अर्ब २६ करोड ) बराबरको आम्दानी हुने गरी सम्झौता गरेका छन्। यो सम्झौतामा थुप्रै बोनस र सुविधा समावेश छन् ।

सम्झौताको मुख्य सर्त

• २४.५ मिलियन पाउण्ड साइनिङ बोनस (दोस्रो वर्षमा £३८ मिलियन पुग्ने)
• ८ मिलियन पाउण्ड बोनस यदि अल-नसरले साउदी प्रो लिग जितेमा
• ५ मिलियन पाउण्ड बोनस यदि एशियन च्याम्पियन्स लिग जितेमा
• ४ मिलियन पाउण्ड बोनस यदि उनले गोल्डेन बुट (सर्वाधिक गोलकर्ता) जितेमा
• अल-नसरको १५% स्वामित्व (झन्डै ३३ मिलियन पाउण्ड मूल्यांकन)
• प्रत्येक गोलमा ८० हजार पाउण्ड बोनस (दोस्रो वर्षमा २०% बढ्ने)
• प्रत्येक एसिस्टमा ४० हजार पाउण्ड बोनस (दोस्रो वर्षमा २०% बढ्ने)
• ६० मिलियन पाउण्ड बराबरको प्रायोजन सम्झौता
• ४ मिलियन पाउण्ड बराबरको व्यक्तिगत जेट खर्च क्लबले व्यहोर्ने

सन् २०२३ मा साउदी अरब आएका रोनाल्डोपछि कैयौँ अन्तर्राष्ट्रिय खेलाडीहरू पनि तेलसम्पन्न देशको क्लबमा आकर्षित भएका छन्।

गत महिना साउदी प्रो लिगको सिजन समाप्त भएलगत्तै, अल-नसर उपाधि विहीन अवस्थामा तेस्रो स्थानमा रहँदा रोनाल्डोले सामाजिक सञ्जालमा लेखेका थिए, ‘यो अध्याय समाप्त भयो।’

तर, साउदी फुटबलको विकासमा उनले खेलेको भूमिकालाई नजरअन्दाज गर्न सकिन्न। साउदी पब्लिक इन्भेस्टमेन्ट फण्ड (पिआइएफ) का एक अधिकारीले भनेका थिए,’पछिल्ला दुई वर्षमा साउदी लिगको विकासमा रोनाल्डोको उपस्थितिले महत्त्वपूर्ण भूमिका खेलेको छ। उनले उत्कृष्ट खेलाडी र नयाँ पुस्तालाई साउदी फुटबलमा आउने ढोका खोलेका छन्।’

पिआइएफ साउदी फुटबलमा ठूला लगानीहरू गर्ने सरकारी कोष हो, जसले अल-नसर, अल-हिलाल, अल-अहली जस्ता क्लबहरू सञ्चालन गर्छ।