काठमाडौं (हाम्रो खेलकुद)- नेपाली राष्ट्रिय महिला टोलीले फिफा वरीयतामा अहिलेसम्मकै उच्च स्थानमा पुगेको छ। नेपाल एकै पटक १३ स्थान माथि उक्लिएको छ।

विश्व फुटबल महासंघ (फिफा) बिहीवार सार्वजनिक गरेको नयाँ वरीयतामा नेपाल ८७औं स्थानमा रहेको छ । यसअघि नेपाल एक सयौं स्थानमा थियो।

८ वर्ष अघिको‌ वरीयता नेपालको यसअघि उच्च वरीयता थियो।‌ सन् २०१७ को डिसेम्बरमा जारी वरीयतामा नेपालले ९१ औं स्थानसम्म पुगेको कीर्तिमान थियो। 

नेपालले गत जुलाईमा उज्वेकिस्तानमा एएफसी महिला एसियन कप छनोटमा गरेको प्रर्दशनका कारण नेपालले वरीयतामा अहिले सम्म कै ठूलो छलाङ मारेको थियो ।

छनोटका ३ खेलमा‌ नेपाल अपराजित रहेको थियो।
एसियन कपको अन्तिम चरणमा पुग्न असफल नेपालले
तत्कालीन वरीयताको एक सय सातौं स्थानमा रहेको लाओसलाई ९- ० र १ सय ५९औं स्थानमा रहेको श्रीलंकालाई ८- ० ले हराएको थियो।

समूह चरणको अन्तिम तथा निर्णायक खेलको निर्धारित समयमा वरीयताको ५१ औं स्थान मा रहेको उज्वेकिस्तानलाई ३-३ को बराबरीमा रोकेको थियो। तर, समान अंक र गोलअन्तर भएपछि एसियन कप छनोटको टुंगो पेनाल्टी सुटआउटमार्फत गरिएको थियो।

उज्वेकिस्तानले नेपाललाई ४–२ ले पराजित गर्दै फाइनल राउन्डको यात्रा तय गरेको थियो। नेपालसँग खेलेको उज्वेकिस्तानको अहिलेको वरीयता ५२ औं स्थानमा छ।

लाओस ६ स्थान तल झर्दै १ सय १३औं स्थानमा पुगेको छ। श्रीलंका १‌ सय ६१औं स्थानमा छ। यो टोलीले दुई स्थान गुमाएको हो।

एसियन कपमा छनोट भएको भारत ७० बाट ६३औं‌ स्थानमा र बंगलादेश १ सय २८ बाट एक सय चौथो स्थानमा उक्लिएको छ। बंगलादेश एकै पटक २४ स्थान माथि उक्लिएको छ।

स्पेन महिला फिफा वरीयताको शीर्ष स्थानमा उक्लेको छ । अमेरिकी दोस्रोमा झरेको छ । पुरुषतर्फको वरीयतामा नेपाल १ सय ७५औं स्थानमा छ ।