नेपल्स (एजेन्सी)– च्याम्पियन्स लिगको अन्तिम १६ को दोस्रो लेगको खेलमा आज राती नापोलीले रियल मड्रिडलाई घरेलु मैदान ‘स्टेडिया सान पोलो’ मा निम्ताउदै छ । पहिलो लेगमा ३–१ ले पछि परेको नापोली घरेलु समर्थक माझ नतिजा उल्टाउने दाउमा हुनेछ ।

सामान्य चोटका कारण बाहिरिएका ड्राइस मर्टेन्स घरेलु टोली का लागि मंगलबारको खेलमा फर्कने भएका छन् । नापोलीका प्रशिक्षक मौरिजियो सरी भने नतिजा उल्टाउने सम्भावना कमै देख्छन् । ‘उनिहरु धेरै गोल गरेका छन् । हामी अझै २ गोलले पछाडि छौं,’ उनले भने,‘यस्तो अवस्थाबाट नतिजा उल्टाउन लगभग असम्भव जस्तै छ ।’

खेल नेपाली समय अनुसार रातको १:३० मा सुरु हुनेछ । 

रियलको अघिल्लो खेल गुमाएका क्रिस्टियानो रोनाल्डो र ग्यारेथ बेल भने मंगलबारको खेलमा फर्कने भएका छन् । रोनाल्डो सामान्य बिमार रहेका कारण ऐबारसँगको ४–१ को जितमा उनी टोलीमा थिएनन् भने त्यो खेलमा बेल प्रतिबन्धित थिए । बेल र रोनाल्डो टोलीमा फर्किए पनि सेन्टर डिफेन्डर राफेल भारान भने तिघ्राको चोटका कारण मंगलबारको खेलमा उपलब्ध हुने छैनन् ।