काठमाडौं (हाम्रो खेलकुद) – श्रीलंकामा जारी फुटबल एक्सचेन्ज कार्यक्रम अन्तर्गत मैत्रीपूर्ण फुटबल श्रृखंलामा नेपालले विजयी सुरुआत गरेको छ । शनिबार भएको पहिलो खेलमा नेपाली यू १५ टोलीले भुटान यू १५ लाई ७–१ को फराकिलो अन्तरले हराएको छ ।

नेपाली युवा टोलीका तीन फरवार्ड रञ्जन पुन , ब्रिजेश चौधरी र रोशन राना मगरले समान २ गोल गरे । अर्को गोल कलोश बखारियाले गरे । पहिलो गोल रञ्जनले नवौं मिनेटमा गोल गरे भने त्यसको एक मिनेटपछि ब्रिजेशले गोल गरे । त्यस्तै कलोशले १४औ मिनेटमा गोल गरे । ब्रिजेशले १९ औं मिनेटमा अर्को गोल थपे । २६ औं मिनेटमा मिनेटमा रोशनले गोल गरे । भुटानले ३१ औं मिनेटमा गोल गरे । दोस्रो हाफमा नेपालका लागि रोन र रञ्जनले गोल थपे ।

एक्सचेन्ज कार्यक्रममा नेपाली टोलीले श्रीलंका र जापानको युवा टोलीसँग प्रतिस्पर्धा गर्नेछ । सुनिल श्रेष्ठको मुख्य प्रशिक्षणमा रहेको टोलीको सहायक प्रशिक्षकमा नबिन महर्जन र सनोज श्रेष्ठ छन् । त्यस्तै टोली अखिल नेपाल फुटबल संघका मनार्थ सदस्य मधुसुदन उपाध्यायको नेतृत्वमा श्रीलंका पुगेको हो ।