काठमाडौं (हाम्रो खेलकुद)- एपिएफ र भारतको इस्ट बंगाल एफसीबीचको साफ महिला क्लब च्याम्पियनसिपको समूह चरणमा अन्तिम खेल बराबरीमा टुंगिएको छ।

त्रिपुरेश्वरस्थित दशरथ रंगशालामा भएको खेलमा‌ एपिएफ र इस्ट बंगालले गोलरहित बराबरी खेलेका हुन् ।
फाइनल पुगिसकेका यी दुई टोलीबीच आजको‌ नतिजाले अंक तालिकामा केही फरक‌ परेन ‌।

आजको खेल फाइनलअघिको तयारको रुपमा लिइएको थियो । लिग चरणको अन्तिम खेलअघि नै एपिएफ र इस्ट बंगालले फाइनलमा स्थान सुरक्षित गरेका थिए।

आजको खेलमा एपिएफले पहिलो रोजाइका रेनुका नगरकोटे, सरु लिम्बू, अनिता केसीलाई‌ आराम दिएको थियो। दोस्रो हाफमा अनिता, सरु र रेनुका मैदान प्रवेश गरेका थिए। दुबै टोलीले केही मौका पाए पनि गोल गर्न सकेनन्।

एपिएफले खेलेका ४ मध्ये २ मा जित र २ मा बराबरी गर्दै ८ अंक जोडेको छ। अर्कोतर्फ शीर्षस्थान इस्ट बंगालले ४ खेलमा ३ जित र १ बराबरीका साथ १० अंक जोडेको छ।

एपिएफले पहिलो खेलमा बंगलादेशको नसरिन स्पोर्ट्स एकेडेमीले ४-० ले हराउँदै सहज जित निकाले पनि त्यसपछि गोलको लागि संघर्ष गरेको थियो।

दोस्रो खेलमा भुटानको ट्रान्सपोर्ट युनाइटेडसँग गोलरहित बराबरीमा रोकिएको एपिएफले पाकिस्तानको कराँची सिटी एफसीलाई १-० ले हराएको थियो।

अर्कोतर्फ ट्रान्सपोर्टलाई ४-०, कराँचीलाई २-० र नासिरलाई ७-० ले हराएको थियो। दुबै टोली अहिलेसम्म गोल खाएका छैनन् । तर एपिएफले ५ गोल मात्रै गर्न सकेको छ। इस्ट बंगालले १३ गोल गरिसकेको छ।

एपिएफले उपाधि जित्नका लागि च्याम्पियनसिपको बलियो टोली इस्ट बंगाललाई हराउनुपर्नेछ। त्यसको परिक्षण आजको खेलमा भएको थियो । कराँची पनि बाहिरि सकेको छ।

आज भएको पहिलो खेल प्रतियोगिताबाट बाहिरिसकेका ट्रान्सपोर्ट र नासिरले‌ १-१ को बराबरी खेलेको थियो।

दक्षिण एसियाली फुटबल महासंघ (साफ) ले पहिलो पटक आयोजना गरेको च्याम्पियनसिपमा ५ सदस्य राष्ट्रको लिग च्याम्पियनको सहभागिता थियो । 
शनिवार एपिएफ र इस्ट बंगालबीच फाइनल हुनेछ।