युभेन्ट्स (एजेन्सी)– पाउलो डेबालाले पहिलो हाफमा गरेको पेनाल्टी गोलमा एफसी पोर्टोमाथि १–० को जित हासिल गर्दै युभेन्ट्स च्याम्पियन्स लिगको क्वार्टरफाइनलमा पुगेको छ । बुधबार १० खेलाडीमा सिमित रहँदै खेलको अन्त्य गरेको पोर्टोविरुद्ध समग्रमा ३–० को अग्रतासहित युभेन्ट्स अन्तिम आठमा पुगेको हो ।

पछिल्लो चार बर्षमा युभेन्ट्स च्याम्पियन्स लिगको क्वार्टरफाइनल पुगेको यो दोस्रो पटक हो । म्याक्सी पेरिराले पहिलो हाफमै मैदान जोड्नु परेपछि खेलमा फर्केने पोर्टोको सम्भावना लगभग समाप्त भएको थियो । नियतवश ह्यान्डबल गरेका कारण ४० औं मिनेटमा पेरिसाले सोझै रातो कार्डको सामना गर्नु परेको थियो ।

डेबालाले पेनाल्टीमा गोल गर्दै युभेन्ट्सलाई जित दिलाए । पछिल्लो आठ च्याम्पियन्स लिग खेलमा युभेन्ट्सको छैटौ क्लिन सिट खेल हो । सन् २०१५ देखि घरेलु मैदानमा अपराजित यात्रालाई युभेन्ट्सले बुधबारको खेलमा पनि कायम राखेको छ । युभेन्ट्स च्याम्पियन्स लिगको क्वार्टरफाइनलमा पुगेको यो दसौं पटक हो ।

घरेलु मैदानका पछिल्ला छ खेलमा डेबायाको त्यो पाँचौं गोल थियो । बुधबारको अर्को खेलमा सेभियालाई २–० ले हराउँदै समग्रमा ३–२ को अग्रतासहित लेस्टर च्याम्पियन्स लिगको क्वार्टरफाइनलमा पुगेको छ । रियल मड्रिड, बार्सिलोना, बायर्न म्युनिख र बोरुसिया डर्टमन्ड यसअघि नै च्याम्पिन्स लिगको अन्तिम आठमा पुगिसकेका छन् ।