ललितपुर, असोज १५
टोप बहादुर विष्टको दुई गोलको मद्दतले सशस्त्र प्रहरी बलको एपिएफले नेपाल पुलिस क्लबलाई ३-० गोलअन्तरले पराजित गर्यो ।
सातदोबाटोस्थित एन्फा कम्प्लेक्सको एष्ट्रो टर्फ मैदानमा भएको खेलमा एपिएफका कप्तान गणेश लावतिले पनि एक गोल गरे ।
लेफ्ट ब्याक टोप बहादुर विष्टले खेलको १०औं मिनेटमा मिडफिल्डर हेमन गुरुङको पासलाई सदुपयोग गर्दै बक्स भित्रबाट पहिलो गोल गरेका थिए ।
दोश्रो हाफको सुरुवातमै विष्टले व्यक्तिगत र टोलीको दोश्रो गोल गरे| खेलको म्यान अफ द म्याच समेत पाएका उनले ४६औं मिनेटमा जङ्बु शेर्पा संग वान टु पास खेल्दै गोल गरेका थिए ।
एपिएफका लागि तेश्रो तथा अन्तिम गोल कप्तान गणेश लावतिले हेडिङ मार्फत गरे । खेलको ७७औं मिनेटमा नविन लामाले मिलाइदिएको पासमा अनमार्क रहेका लावतिले गोल गरेका थिए ।
