स्पेन (एजेन्सी)– स्पेनिस ला लिगमा रियल म्याड्रिड शीर्षस्थानमा थप मजबुद बनेको छ । शनिबार एथ्लेटिक बिल्बाओलाई २–१ ले हराउँदै रियलले दोस्रो स्थानको बार्सिलोनालाई ५ अंकले पछाडि पारेको छ ।
खेलको २५औं मिनेटमा करिम बेन्जेमाले गोल गर्दै रियललाई अग्रता दिलाएका थिए । क्रिस्टियानो रोनाल्डोको क्रसलाई सदुपयोग गर्दै बेन्जेमाले गोल गरेका हुन् । तर ६५औं मिनेटमा अरिट्ज अडुरिजले हेडर मार्फत गोल गर्दै खेललाई बराबरीमा पुर्याए ।
तर, अडुरिजले खेललाई बराबरीमा ल्याएको तीन मिनेट नबित्दै रियलले खेलमा पुनः अग्रता बनायो । क्यासेमिरोले कर्नरबाट आएको बललाई नियन्त्रणमा लिंदै गोल गरेपछि रियलले दोस्रो पटक अग्रता लिएको थियो ।
रियल २७ खेलमा ६५ अंक जोडेको छ । समान खेलमा बार्सिलोनाको ६० अंक छ । ५७ अंक सहित सेभिला तेस्रो स्थानमा छ । आइतबार बार्सिलोनाले भ्यालेन्सिया तथा सेभिलाले एट्लेटिको म्याड्रिडसँग खेल्नेछ ।
