म्यानचेस्टर (एजेन्सी) – जर्मनीका पूर्वकप्तान एवं म्यानचेस्टर युनाईटडबाट व्यावसायिक फुटबल खेल्दै आएका स्टार मिडफिल्डर बास्टियन स्वाइन्सटाइगरले क्लब छोड्ने भएका छन्। अमेरिकी क्लब सिकागो फायरले उनलाई १ वर्षको करार दिएपछि युनाईटेड छाडेर उनि एम.एल.एस. खेल्न अमेरिका जाने भएका हुन्।
म्यानचेस्टर युनाईटेड र सिकागो फायरबीच सोमबार भएको सम्झौता अनुसार स्वाइन्सटाइगरले आजकै मितिबाट युनाईटेड छाड्नेछन्। उनले आफ्नो फेसबुक भिडियो मार्फत सम्पूर्ण समर्थक र आफ्नो खेलाडी साथीहरुलाई धन्यवाद दिएका छन्।
उनले आफु यस क्लबबाट खेल्न पाउनुमा गौरव लागेको र समर्थकहरुको सद्भाव र उत्साहले आफु प्रभावित भएको पनि बताए।जोसे मोउरिन्होको नजरमा नपरेका स्वाइन्सटाइगरले यस सिजन वैकल्पिक खेलाडीका रुपमा धेरै समय बिताएका थिए।
बाँकी समय पनि उनको खासै प्रयोग नहुने देखेपछि युनाईटेडले फायरको आग्रह स्वीकारेको हो। सन् २०१५मा लुइस भान गालले बायर्न म्युनिखबाट ओल्ड ट्राफर्ड भित्र्याएका स्वाइन्सटाइगरलाइ पोर्चुगिज प्रशिक्षक माउरिन्होले भने जुनियर टोलीसंग प्रशिक्षण गराईरहेका थिए।
उनले आफ्नो बिदाईको क्रममा हालेको भिडियो तल हेर्न सकिनेछ:
